ايييه بس يا Google ..

والله يا يجونك ناس تححححححف تححححححف .. أتحف شيء بالدنيا خلاااااص ! < ما تلاحظون دخلت بالموضوع على طول ؟ موب من عوايدي

إلا على طاري التحف .. عيال عديلي تحف عظيمين منهم اثنين توأم عمر ومعاذ .. قبل فترة راحوا لأمهم .. قالوا يمه نبي ثوب ابوي قبل لا تغسلينه .. < الطلب غريب .. بس وش تسوي ما عيت عليهم

اكتشفت عقب نص ساعة واحد لابس ثوب أبوه والثاني متلحف بعباية امه .. اللي لابس ثوب مسوي يكلم تلفون ويقول ألووووه انا براء يله أنا عند الباب طلع واحد ممثل إنه أنا والثاني ممثل انه زوجتي ههههههههههههه ههههههههههههههه خبلان الله يصلحهم ..< والله يا أنا ما أعرف أوصف .. أجل خبلان الله يصلحهم < والله يا أنا شطحت بعد

المهم وش كنت اسولف عنه .. < من كثر شطحاتي ودك يخترعون app بالآيفون .. لا شطحت يجي يسطرني كف يرجعني للموضوع نفسه < شرايكم فيني اعرف المح اني صرت آيفون يوزر نيم ؟ < يسمع بالقيك < عاد مدري وش العلاقة بين استقالة ستيف جوبز وبين شريتي للآيفون ؟ 

المهم عشان ما ابعد كثير .. تعرفون اني لي علاقة خاصة مع الأخ Google ..

وكتبت عن الفاهين اللي يوصلهم لمدونتي الحلوة في ثلاث أجزاء سابقة ..

وهذي الأجزاء اللي قبل :

1- أيوااااه يا قوقل !

2- قوقل مرة ثانية برضو !

3- قوقل للمرة الثالثة وشكرا !

المرة ذي جزء رابع .. وللي موب فاهم السالفة أقول له وبالله التوفيق ..

رح لم التدوينات اللي قبل وتعرف !!! فاضي أنا فااااضي أعلمك هاه !!! < كيف بالله اعرف اعصب

السالفة وما فيها إن ذي عبارات أو كلمات دلت العالم على مدونتي .. بعضها مدري وش يبي .. وبعضها مشفر وبقوة

قلت أوريكم كم واحد من البتاعات اللي جتني .. طبعا الكلمات وصلت إلى 6320 كلمة تقريبا ! < يعني يمدي اسوي 1500 تدوينة < امحق مدونة وامحق ثراء معرفي ومحتوى عربي

المهم ما ودي أطول صراحة لأني لو بأطول بأشطح والشطح موب زين ابد ابد ابد

نبدأ ؟ < الحين وراي أشاور ؟ موسوس مثلا ؟

[ طلابي كانوا وش زينهم ]

يا حراااااام ليه وش سووا لك فضفض فضفض .. ههههههههه يعني بالله تقول لـ Google كذا وش بيرد عليك مثلا ؟ هههههههههههه

[ بوه ]

ههههههههههههههههههههه ما ودي أحلف انه قصمنجي وتوه طاف بالبحث بـ Google ههههههههههه أجل بوه ههههههههههههههههه لا ووصل لمدونتي ههههههههههههههههههه هههههههههههههههههههه !

[ google العب فله ]

خلوني اقول لكم قصة ذا البحث .. قوقل رايح لناس ومستحي .. وجاي واحد يقول له العب ترى فلة

[ الى الامام ياجامعة الامام ]

وييييين تصحح دفتر طالب أنت إلى الأمام ههههههههههه .. على الطاري يا كرهي لذي العبارات على الدفاتر احس تغث بس خلوا عنكم كنا نتغاير بالفصل وش كتب لنا المدرس < دوافير

[ روايات نظيفة ]

يعني تبي استعمال حشمة ؟ ..

وإلا مثلا مغسولات بتايد ؟

[ طايرن مقلع ! ]

بالله داخل قوقل تبحث عن ذي الكلمة تستهبل انت ؟ !! موب معقول البحث الخطير ههههههههههه لا وواصل لمدونتي بعد لا وحاط تعجب عقب ههههههههههههه

[ أذ قال لك أحد وش علومك وش أقول ]

أبد اسحب عليه ورح لا ترد عليه ترى قصده موب زين !

[ أخر مرحله في تقويم الأسنان ]

آخر مرحلة تقتل الوحش وينتصر الخير .. أجل آخر مرحلة ههههههههههههههههه !

[ أنا مركبة تقويم وش أسوي إذا جيت انام ]

من جدك تبين تنامين وأنتي مركبة تقويم !!! ممنوع ممنوووووع خطر على صحتك !! ..

أجل وش تسوين هههههههههههه وش دخله بالنوم مثلا هههههههههههههه

[ ابي اركب تقويم اسنان بس ما معاي دراهم ]

شباب قطه للرجال يستاهل .. شكله من جد معاني ويبي دراهم !

[ ابي شيئ ينحف خشمي ومجرب ]

ايه لا لقيتوا له شيء قولوا لي اجربه معه هههههههههههه بالله شلون شيء ينحف الخشم ؟ تخيلوا خشم مكرش هههههههههههه !

[ اثبت لي انك خواف ]

هههههههههههههه .. سم ؟ ههههههههههههههههه طيب نثبت لك بس وش دخل Google بالسالفة ههههههههههه ! ؟

[ اللبس مبتعث جنز ]

ذي شكلها ركتب الجملة التالية .. قسما ما ادري وش الفايدة منها هههههههههههه !

[ انا رحت اجري وجاني شد عضلي ]

ههههههههههههه يا إلهي ؟ شلووون ؟ طيب يوم تجري كنت شاد حيلك ؟ أو نص ونص ؟

[ اهضم العيديات بعيد الاضحى ]

يؤ !! يا رجال قل غيرها !! وش تسوي فيهن انت ؟ تراهن عيديات يعني فلوس يعني موب للأكل !

[ فرضا ابي أرسل فيروس لايميل شخص مزعجني كيف ]

والله الرجال مؤدب .. أهم شيء بالبحث فرضا .. يعني يا Google لا تفهمني غلط ترى فرضا يعني موب ناوي صدق ههههههههههههه

[ غلطان يا اخي البراء ]

سم طال عمرك .. بس بوشو ؟

[ ماهو الجاف ولماذا ]

شف يا الغالي .. الجاف ما أقدر افيدك فيه .. أما لماذا فأنا اقول لك ليه .. هههههههههههههههههههههههههههههههه !

بغض النظر إن الرجال يحاول يتعلم من Google .. بس السؤال خطيييييييييييييييييييييييييييييييييييييييييير

[ ياخوي في تشجيل بجامعه الامام سعود والا لا ]

والله يا ذي العبارة راكب معها ذا السمايل : ! هههههههههههههههههه ههههههههههههههههههه لحاله ذا ..

أجل تشجبل وياخوي هههههههههههههه متوهق الرجال مسيكين وأقرب Google ههههههههههههههه !

وفي الختام ..

فتكم بعافية < أخس والله ختمت بسرعة بدون فلسفة

عدنا < طبعا بصدى كذا وبصوت خشن زي حقت سبيستون

يووووه ناوي افحط بمناسبة العودة < يا قدمي تفحيط .. الحين العالم تطورت صارت تسوي درفت < الدرفت بين قوسين تفحيط الخكاريا وهو المتعارف لدى الشعب القصيمي بالزعق < الأخوات اللي ما فهمن إذا لا قدر الله سقتوا وإن شاء الله ما تسوقون أشرح لكم وش هي ليه ما أبيكم تسوقون ؟ بكيفي

طبعا أعرفكم يا عيال الذين آمنو محد فقدني ولا شيء !

قاسين متوحشين كلكم ما تحبونن < عاد تخيلوا خكري يسولف قصيمي موب راكبه أبد أبد أبد

الموهيم !

تدرون ليه وقفت المدونة ؟

أتحداكم أصلا ..  أصلا أصلا ما لكم دخل < أعصابك يا الحبيب وراك قلبت ؟ نفسية مثلا أو ما تعرف تسولف أو شسمه هذاك ؟

القضية وما فيها أن وقت التجديد جاء بوقت غلط جدا بالنسبة لي قلت يا ولد خلها توقف شوي المدونة ولسان حالها يقول :

خلني أوقف اليوم وأرجع باكر .. وأشوف منهو بعد وقفتي فقدني ..

لكن ما وراكم سالفة ..  محد طق خبر لا يا الكريهين !

^

ترى اللي فوق نشيد يعني تخيلوه بلحن

على طاري كريهين < وخروا وخروا جت له سالفة !

أخوي الخطير أحمد بوم بوم اسطوانة الأفراح .. < طبعا بوم بوم واسطوانة الأفراح لهم سالفة خلوها بعدين < لا لا تكفى علمنا أنت وذي الابتسامة الدلخة

المهم ومالكم بالطويلة .. أخوي أحمد لا بغى يلمح لشغلة إنه يبيها وش يسوي ؟

يروح للي يتوقع إنه يخدمه فيها .. مثلا مرة يقول لي : براء براء تعرف سفوري لاند ؟ قلت ايه وش فيها ؟ قال تراها كريهه وه شكرهها ..< شكرهها ذي اختصار لـ [ وش كرهها ]

أقول له :  ليه ؟ حلوة وألعابها حلوة ليش كريهه ؟ يقول لا وعععع شكرهها وعععع .. ودنا لها عشان تعرف ليه كريهه !

لا لا أسلوب أسلووووووب كبييييير جدا جدا جدا   لا ولو الولد خطير جدا

المهم .. وكتبت بالتويتر والفيسبوق < صورة مع الشكر لتنين المدينة

إن المدونة بتتوقف مؤقتا ..

فجأة .. وبعد مرة وبرهة طويلة ليست بالطويلة فجأة وبعد فجأة ثانية وفجـ .. ! < كمممممممممل السالفة !!!

طيب طيب لا تزاعق ! < قسما نفسية أهاوش روحي !

فجأة .. تراي قلتها مرة وحدة ما قلت مثل شوي فجأة وبعد برهة وخرابيط يعني لا تزعلون ! < اخلص طيب

أتى ذلك الفارس الجميل .. على حصانه الأبلق الأبيض الأدهم الأجمل !

أتى حاملا وردة في فمه ! < هههههههههههههه عاد تخيلوا شكله والله يا ما تركب يا أبو هيثم !

يؤ فضحت من هو !

أتى أبو هيثم الجميل واستضافني لديه بكل ترحاب وحب ! < ما يحتاج افضح بعض تفاصيل التأخر وإلا ؟ < يقال لك ما فضحت الحين يا الدلخ

فشكرا له ثم شكرا له .. يله كل واحد يشكره وإلا كان ما شفتوا خربطتي مرة ثانية ! < والله بنفتك وأنا أخوك !

أحس فيه واحد مستانس اسمه تورتيلا عبد الله الصباح السعود الفارس ! < والله أثر اسمك كشخة تنفع تصير من عايلتين حاكمات يا الكويت يا السعودية

ههاااااي أخ تورتيلا .. مقطعك موجود بالحفظ والصون وأول ملف حرصت على نقله هو !

وش كنت بأقول بعد !

يووووووووووه نسيت !

هابي بريث طي تو ماي بلوووووق ! هابي بيرث طي بعد شهر وشوي هابي بيرث دااااي < بصوت عمال أبل بيز < شرايكم فيني موب حركة أعرف أبل بيز وحركات أنا وأعرف بعد بوفية سعيد الحظ ! < إييييه بس وين اللي ما تحلى بوفية سعيد الحظ إلا معه !

مشتااااق لك يا الدب !

إيه ترى مدونتي كملت 3 سيناوات ! أبي أسوي لها قرقيعان مدري عانية ! أهم شيء يجيب فلوس وهدايا لي

على طاري هدايا لي ما لقوها إلا الأمهات الأجداد يعايدون البزران الصغار اللي أصغر من سنة وتروح بجيوب أمهاتهم حركة والله ! < هيه براء براء اعقل اعقل بس فشلتنا قدام اللي يسوي واللي يسوى بعد !

احححح اححححم !

شكرا لكم .. فبدونكم لن نستمر .. ولم نكن لنصل إلى هذه المواصيل الكويسة أبدن أبدن ! < وراي بديتها صح ثم حستها ؟

إيه ع الطاري .. اللي عندهم موبايلي .. حولوا لباقة واجد قد إنها زيييينتن بالحيل .. فاتورتي فرقت معي حول 70 ريال !

وعلى طاري موبايلي ..

وش يحسون فيه stc ؟ هيييييه ! اس تي سي !! وش تحسون هاه !

وصلت فاتورة تليفوني إلى 500 وشوي .. ثم فصلوه .. طبعا أنا ما أدري انها نزلت !

يوم كلمتهم قالوا ما سددت وتقدر تقسط لو بغيت .. قل طيب قسطوها .. قالوا ما نقسط إلا فوق 1000

تستهبلوووووون ؟ .. فجأة اكتشفت إنهم رجعوا الخط استهبااااال ! طلعوا موافقين على التقسيط !

وعلى طاري التقسيط .. يا سلمان صدقني ما فيها أتوتيون ! !

وه وه بس بس بأختم ! والله يا أنا تعبتكم !

مبارك عليكم الشهر ..

وأشوفكم على خير !

ولها فقط ..

لها .. فهي التي شغلت بالي ..

وأحالت حياتي نعيما وزادتها جمالا ..

لـ زوجتي الحبيبة !

لحفظ القصيدة !

شكرا لـ :

عبد الرحمن الراشد و سلمان اليحيى على ما بذلوه .. وعقبال ما تهدون لزوجاتكم !

ختامًا :

أسأل الله سبحانه وتعالى أن يوفقها في اختباراتها ..

وتتخرج بتفوق ونجاح كما عودتني ..

اللهم وفقها ووفق كل الطلبة والطالبات ..

اضغط على البنر للذهاب لصفحة الخدمة ..

بحمد الله وتوفيقه أطلق اليوم خدمتي لكم يا زواري الكرام ..

بالتعاون مع أخي : عبد الرحمن الراشد

فلكل منا ذكرياته وحفلاته وأوقاته السعيدة التي لا يفرط فيها ..

ويحتاج لشيء يذكره فيها لتخلد في ذاكرته ..

هنا أنا لألبي لكم ما تريدونه من إلقاء لقصائد تخرجكم ، أفراحكم ، إهداءاتكم وكل ما تريدون ..

وأسأل الله التوفيق والإعانة ..

غبااااااااااااااااااااااااااار والله يا أنتم قديمين تصدقون نسيت وين زر إضافة تدوينة ؟

مرحبن بكم مرحبن جدن !

أححححح تعبت أحس ما فيه لياقة !

كمنتشسيب كمنتشسيب كمنت شسيب ! < أيوه كويس

تصدقون مدري كم صار لي ما كتبت ؟ الظاهر 7 شهور !

اصبروا لا اشطح ثم أنسى وش بأكتب عنه !

في تاريخ 19/7/1431 هـ تغير وجه التاريخ ..

وغربت شمس الظلام .. وأشرقت شمس الشسمه هذاك ! لكن !! .. لكن !! لكن !!!

في ذلك التاريخ وذلك التاريخ فقط بدأت الإجازة الصيفية للطلاب ! < احلف نحسب وراك سالفة

تخيلوا التدوينة عن ذا بس تحطييييم صح !

اييييه وسرى الليل يا أبو تلاتة وسرى الليل يا أبو تلاتة < عليك سمايل مناسب الصراحة قصدي

على طاري أبو ثلاثة نسيت وش كنت بأقول عنها راح الطاري خلاص خلاص ما أبي اقول شيء خلاص

في 19/7/1431هـ

في هذا التاريخ تغير عالمي ! ليش ؟

اصبروا طيب !

في ذلك التاريخ دخلت إلى عالم الزواج وخليت العزاب متوهقين بروحهم يدورون احد يعطيهم حنان ! نياهاهاهاهاهاها عزابية هيق هيق هيق هيق !

روح اتزوج يا غيران !

اللي اتصاله كيف الحال يدبر روحه فيه صور واجد جاكم العلم لا تقولون براء ما قال ايه جاكم العلم عاد اييييه جاكم جاكم وخروا عن طريقة ما غير يترقع بـ 5 وبـ 8 وكلها طبعا خطط مدروسة  ! سرا سرا عاشو عاشو !

بسم الله نبدأ !

أظهر هنا وأنا دايخ لأني ما نمت زين لعل امي جزاها الله خير تحمست وصحتني الساعة 8 الصباح عشان أتجهز والملكة العصر !

يا حبي لك يا يمه مع حماسك !

طبعا الخجل واضح أيضا .. يا حليلي خجووول قدن قدن !

صورة لي وأنا أتفقد أوضاع الأكل !

مدري ليه على ذا الورد حسيت إني فلبيني أدور ورد عشان أصور معه !< ما تركب فلبيني واسمه البراء

وعلى طاري الهمي أو الأكل عشان الشباب الدببة مثلي وأشكالي يشبعون ناظريهم

صورة لنوع من الحلى .. الحق اني اشتهيته لأني أصلا ما أكلت مع العالم دلخ !

أبي مثله !

ليش ما أكلت منه ليش ليش ليش ؟

نروح نشوف الضيوف ؟

من قال ايه ؟ ما أبي أروح عناد !

أنا وعمي رياض في ردهة مجلسنا ننتظر الضيوف < كييييف ردهه بالله مركزة الكلمة قوية الحقيقة !

الضيوف في مجلسنا

الضيوف في مجلس أبوي < يقال لك مغير الحين عن مجلسنا

فاصل إعلاني !

تقويمك للاسنان في مستشفى العسكري .. سيجعلك أكثر فهاوة !

عدنا !

مديل الصورة عمر الدوسري ولد عمتي !< أما مديل حسيت اني شريطي بالمعارض

أخوي حسان المصور العظيم الدلخ العرمرم مصور الناس أكثر مني .. حسان سأمزعك أيها الدب !

عمر بالله وش تحس على ذي الابتسامه ! هههههههههههههههههههه بس يظهر إن الاستبنة طلعت وهذا تقدم !

الآن حدثنا الأهم ! وخبرنا الأعظم !

طن طراااااااااااااااااااااا !

البراء يسحب ع العزاب في الصورة القادمة !

ويظهر كم السعادة على خشته مقارنة بأول صورة !

ولنقف لحظة مع القزم اللي قاعد يساري ..

الخبل المدعو أحمد !

الأخ اللطيف هذا مصر اصرارا تاما إنه يجي بجنز وصار اجتماع لوجستي لبرلمان بيتنا في محاولة للاقناع !

فجأة دخل علينا والشيخ يكتب الكتاب والعالم متحمسة ويفتح الباب ويقول : ….. !

معليش قوية الكلمة قوية قوية !

قال يوووووه براء وأبوي وذولي موب رجاجييييييل ! ويشر على كم واحد من الضيوف أنتو موب رجاجيل !

كلنا فهينا وش يبي ذا الخبل موب وقته

قلت : لييييه ؟ قال ما لبستوا شماغ لابسين أبيض ههههههههههههههههههههههههههههه !

اكتشفنا ان خواتي قايلين له اللي يلبس شماغ رجال اللي ما يلبس حرمة والأخ قرر إننا حريم أشوى إن الشيخ لابس شماغ كان صارت فااادييييحاااااا !

صورة أقرب للرجل العظيم صاحب الشماغ الخطير وهو مشخص كوبرا صاير كنه مقدم بالقناة الرياضية < بالله تضحك على ايش ؟ من زين الذبه الحين قاعد تضحك عليها ؟ !

قولوا ما شاء الله

ما شاء الله !

وهنا صورة للشيخ أحمد عقب ما خرب أمها وفصخ الشماغ وتهاوش مع الشيخ اللي جاي يكتب الكتاب !

واضحة ابتسامة النصر على وجه حبودي

وقلطنا الرجال ع الأكل متعيجز أشرح لكل صورة

طبعا فيه واحد خطيييييير خطييييير جدا متحمس وهو ياكل !

يا عبد الله الله يهديك ما تعرف تاكل وصخت ثوبك < هذا اللي متعيجز يشرح على الصور ؟ < وش دخلك مدونتي وبكيفي < الحمد لله ع العافية يهاوش روحه < الحمد لله ع العافية يهاوش روحه ثم يتطنز على نفسه ! < الحمد لله … بس بس وقف لا يشطح !

ورجعنا للمجلس وبدت حركات الأخ عمر المعروفة !

عليييييينا يا عمر عليييييييينا ؟ تبي تتمصلح مع الشيخ يزوجك ؟ هاه ؟ عليييينا نياهاهاهاهااااااا !

لكن هذه الحركة لم تمر مر الكرام على أحد الأشخاص الجميلين الأذكياء !

كييييييف النظرة ؟ رععععععععععععب عارف لك يا عمر خبز يدي

هنا يظهر أحد الأشخاص القميلين قدا .. واللي من حسات الزواج إني تعرفت عليه !

نسيبي الرائع أحمد النغيمش أول واحد ع اليسار !

أول واحد ع اليمين عديلي عبد الله البريكان .. وبالصورة ولده الكبير يوسف يحاول يصادق الرجال أحمد بس بدون فايدة !

عمي أبو زوجتي .. الله يحفظه ويخليه !

عمي قصي وبعض التوجيهات والنصائح < نصائح ميييين أشوى اننا نسولف عن البر الظاهر

والحين فترة الصور الجماعية !

من اليمين : ولد عمتي صالح الدوسري ، ولد عمتي عمر الدوسري ، خال أبوي توفيق الريس ، مدري منهو نسيته ، بابا ، عمي قصي ، عمي رياض ، إبراهيم أخوي ، عبد الله توفيق الريس

من اليمين : إبراهيم ، أنا ، عمر النشبة ، بابا < بالله موب كني أنا إبراهيم أكبر من أبوي الله يحفظك ويخليك لنا !

عمي رياض يخرب الصورة !

عمر يحاول يجرني لمستنقعات العزوبية وأنا ارفض

وأخيرا ..

حسان أخوي يتقهوى عقب ما تعب من تصوير العالم ولا صورني أنا !

قبل الختام :

افتقده جدا أتلفت حولي طمعا أن أراه ولو كان خيالا كان حريصا علي ، متابعا لخطواتي ، أكثر من فرح بخبر خطبتي وأكثر من بشر الناس به رحمك الله يا جدي فقد توفي قبل ملكتي بشهرين ! رحمك الله رحمة واسعة وأسكنك فسيح جنانه !

افتقدت أيضا بدر الدوسري ولد عمتي ورفيق صغري ! لدراسته في كندا ..

وفقدت أيضا – وإن لم أكن رأيته في ذاك الوقت – نسيبي الرائع والأخ الأكبر لزوجتي ، عبد الله النغيمش لدراسته في بريطانيا والحمد لله أتمها وأخذ الماجستير !

وأيضا من من فقدت رفيق دربي وأعز من عرفت صاحبي : بدر الشملان !

شكرا لكل من تابع ولكل من بارك واعذروا انقطاعي ! ..

محبكم : البراء

مقطع يغني عن ألف كلمة ..

أتى مناسبا لنقاش خضته اليوم مع أحد منسوبي مدرستي مدرسة الحضارة الأهلية !

يا رب أصلح حال طلابنا ليصلح حال مستقبلنا !

.

.

نياهاهااااااااا !  < يؤ وش جاني

السلام عليكم !

بالله وش رايكم بالعنوان ؟ تحسون مؤدب ؟ هيق هيق هيييييق !

وعلومكم يا عوال عساكم طيبين ؟

كيف بالله التصميم بالرسام < جهازه خربان

قد سبق لي يا الوجيه الطيبة اني كتبت لكم تدوينتين طيبتين بالحيل .. وبنات ناس وسنع ومنع وخلع وشلع ودلع < وقفوا لا يتحمس

على طاري لا يتحمس ومن هذا المنطلق اقول لهارد جهازي الداخلي وداعا أيها الدب النكبة لماذا ؟ لماذا تفعل هذا بي في أحسن أوقات التكية على الجهاز والحربشة فيه في وقت الاختبارات بالله عليك فيه هارد يخرب وقت الاختبار ؟ شلون نشوف اللي بالهارد لأن أحسن وقت لمثل ذي الأمور هو وقت الاختبارات

تراكم لو عطيتوني وجه وخليتوني أشطح قسما ما أخلص من الشطحات ! < زين تعرف روحك

لا تعطوني وجه سمعتوا < سم طال عمرك اللي ما يسحب عليك موب شسمه

ايه وين وصلت بالسالفة ؟ وصلت لسالفة التدوينتين اللي قبل .. يؤ وش أكتب عنه أنا أصلا الحين < أيوااااه ضاع وش يرجعه

سبق لي أنا البراء الكويس أن تكلمت عن قوقل الكويس وكيف الناس الدلوخ يبحثون بذكاء ومنعة وحسن تصرف وإجادة وامتياز وفهاوة جيدة جدا تجعلهم يصلون لمدونتي الفاهية التي لم تذهب بعيدا عن صاحبها الفاهي البراء الرشود الله يعافيكم ولا يبلاكم

أجل فيه واحد يكلفه المدير بمفاتيح خزنة الأسئلة حقت اختبارات الطلاب ويطلع ذاك اليوم بكل رواقه للدوام بدري ويوصل للمدرسة ويوم وصل وجاء بيدخل فجأة !!!! < كيف فجأة مكانها صح ؟

فجأة .. يكتشف انه ناسي مفاتح الخزنتين بالبيت وباقي على بداية الاختبار 15 دقيقة ويحتاج حول نص ساعة يروح البيت ويجي !

طبعا لحد يدري ان اللي سوا الحركة اللي فوق انا

يا ليل شطحت ونسيت أحط رابط التدوينتين !

التدوينة الأولى وبعض الكلمات اللي مدري وش تبي وتوصل لمدونتي : أيوااااه يا GooGle ! و بعد هذي التدوينة تحسبون الناس عقلوا ؟ ههاااااي نو نو أبدا اطلاقا نفر ناهي كورشانااااا أيوا اوشتاااااذ < ذي ما يعرفها إلا عبد الله السحيباني !

رجعت وكتبت بصوابعي الكويسة جدا تدوينة أخرى .. حفظ الله صوابعي في حلي وترحالي  !

التدوينة الثانية كانت بعنوان : GooGle مرة ثانية برضو ! !

وبعد فجأة من المرة التي تحدث بعض المرات أحيانا غالبا .. مسكت معي ودخلت أشيك على آخر كلمات البحث اللي وصلت لمدونتي !

يااااوك والله يا فضايح فيه وكلمات مدري وش تبي كله بسبب أبو سحلب سعيد الشهري ! < واحد وده يجيب طاري واحد بأي طريقة

كلمات البحث اللي وصلت لمدونتي حتى الآن بلغ عددها : 4,533 كلمة والحمد لله ! < من كثر قرقك والله !

وش رايكم أبدأ بأول كلمة ؟

لحظة لحظة ليش أشاور .. بأبدأ كيفي مدونتي حقتي < يؤ انحاشوا قفلت !

تقويم الأسنان بدون قواعد

بدون قواعد وإلا بدون نحو ؟ < بدون ظرافة أنت وشماغك !

—-

البراء الرشود وش اسم أمك

هههههههههههههههه الحين متعب حالك ورايح تسأل بقوقل كان سألتني eko ! ههههههههههههههههههههههه !

—-

مقطع لطفل يضحك يازين الاطفال

هذا الظاهر يوم كتب طفل يضحك تذكر ان الأطفال زينين ويونسون فلعله تحمس وقال يا زين الأطفال ! < لا عمرك تشرح تكفى

—-

هل بندر الغميز

هل البراء الرشود ؟ لماذا سعيد الشهري ؟ ليش سلمان اليحيى ؟ ! هههههههههههههه والله يا سؤاله خطير !

الله يذكرك بالخير يا بندر

—-

أبي أشوف البراء الرشود ، وشلون ؟

مدري والله !

شفتوا كيف مشهور الناس يبون يعرفوني ويشوفوني يا للهول !

—-

أبي بحر يالبراء الرشود

سم أبشر .. أحد يبي بر ؟ جو ؟ شيء ثاني أجيبه على طريقي ؟

—-

ابره الاسنان اه يعور 3 مرات وراء بعض الابره

يا الله يعور ثلاث مرات ؟ .. طيب مرتين مثلا أو أربع عادي !

اللي يرتب الجملة له هدية

—-

ابغى رابط قوقل

ههههههههههههههههههههههههههههههههههههههههههههههههههههههههههههههههههههههههههههههههههههههههههه !

ههههههههههههههههههههههههههههههههههههههههههههههههههههههههههه ! ذا تحفة لحاله ههههههههههههههههههههههههههه !

انت تبحث بقوقل وتبي رابطه هههههههههههههههههه !

—-

ابو مرعي وكيل مدرسة

ما شاء الله .. معاك البراء مدرس مدرسة !

—-

ابي اتكلم مع دكتور علم نفس

ع العين والراس بس جاي مدونتي تبي علاج ؟ الظاهر بتزود حالتك

—-

ابي تعليق على كلمه يا الهي كم انا خقق

ههههههههههههههه بالله عطوه تعليق عجزت أحصل عندي بالبيت .. كان عندنا كراتين تعليق بس قضن ولا شرينا

—-

اد الضرس مكسورة قطعة من الحشوة مازا يصير

اد مكسورة مازا ؟ من يقول ؟ هاه ؟ كن واقفا !

—-

اغنية ايدي واوا وبطنى واوا كلى واوا يجى 300 400 مليون واوه

كم طلع آخر كلام كم واوا ؟

—-

هههههههههههههههههههههههههههههههههههههههههه سم طال عمرك بنرد لك خبر ههههههههههه

هههههههههههههههه وعليكم السلام يا عزيزي الكارئ ! هههههههههههههه !

حليله كوكل مدري قوقل اثره يسولف مع الناس وراه أجل ساحب علي الظاهر معطيني بلوك !

تعوذ من ابليس يا ابن الحلال خبري به 1000 متر

هههههههههههههههههههههههههههه الظاهر الدكتور شابك سلك بخشمك هههههههههههههههههههههههههه !

كيف نطبخ الدبه

هههههههههههه شيء جديد ذا أبيه وش دبته ذي فيه اكله كذا اسمها ؟ ههههههههههههه !

هههههههههههههههه مدري ليه أحس إنه مراد اللي باحث ذا البحث هههههههههههه !

مدري والله الظاهر احمد اصرف ههههههههههههههه !

نختم بذولا الفاهيين والله يا أحس انه واحد أعرفه

ههههههههههههههه !

البراء الرشود صار ماجستير قوقل بارك له نيابه عني تكفى

ههههههههههههههههههه المهبول مهبول هههههههههههههههههههههههههههه

وه يا تعبت أحس التدوينة طويييييييييييييييلة !

طيب قفشات ع الطاير قبل لا أنهي البوست : < كيف البوست بالله موب حركة ؟ تحسون اني كيوت وواحد لطيف جدا ؟

1- أول تدوينة لي بعد عقد قراني وانتقالي من سجن العزاب إلى حرية الزواج .. يا رب وفقنا واجمع بيننا بخير !

2- مدونتي كملت سنتين ! : heh فلا تنسون تشاركون بالتصويت اللي على جنب

وشكرا ..

محبكم : البراء

السلام عليكم ..

” الحب عالم من العواطف , ودنيا من الشعور ,

فيها كل عجيب وغريب .. وليس لنا إليه إلا هذه الكوة الضيقة,

الكلمة القصيرة ذات الحرفين : الحاء والباء,

الحاء التي تمثل الحنان, والباء التي تجعل الفم وهو ينطق بها , كأنه متهيئ لقبلة .. ”

الشيخ علي الطنطاوي !

وهل ألام في حبي ؟

لك يا من أحب !

للحفظ : في ليالي الحب يحلو الأرق !

كلمات الشاعر : أسامة عبد الرحمن

من ديوان : شمعة ضمأى

إلقاء : البراء الرشود

هندسة الرائع : عبد الرحمن الراشد

..

..

..

معليش داري هاجة معي بالعنوان بس تحسون اني خطير يوم يصير معي لقاء ؟

أصلا أنا عادي أسوي لقاءات وحركات بس تنسقون مع وكيل ثاني ثانوي المفوز قصدي وكيل أعمالي < شبكت مع المفوز معليش

ودي تأذنون لي عشاني منقطع من فترة < لا ما نبي أصلا ما عندي استئذان الإستئذان من الوكيل < ذا اللي شابك خط على المدرسة

إلا ليه الطلاب يحبون يستأذنون ؟ من صرت مرشد وهم بالشيني أنواع اللي يبون يستأذنون وخذ نصب < درينا انك مرشد طلابي بالله صفقوا لي بالله

اييييه والله يا شطححححت

ايوه من مدري كم اسبوع كلمني المدعو عبد الرحمن الراشد < اللي بيشوف ذا السطر يقول وش عبد الرحمن الراشد ذا اللي كل شوي طاب بكل تدويناته يا كثرك يا سموتااا

قال عندنا بغرفة المعالي الصوتية لقاء اسبوعي وودنا نستضيفك .. طبعا أنا مشغول وقلت لازم أتغلى ووافقت < يسمع بالتغلي

طبعا يوم وافقت ومن باب الإستغلالية البحتة قلت ما عندي مشكلة أجيك وتسوي لقاء بس عندي كم شغلة بأسجلها تحلييييييييييييبل

معليش عبد الرحمن والله أحبك جدا وأعلم أني تورطت جدا ولكني جدا ما صرت جدا لأني جدا أصلا خلاص جدا < اصصصص تسمع أنت بتكوين الجمل

طبعا جيت وأصقع لكم ذيك القصيدة الغزلية مع قصيدة ثانية ثم بدينا اللقاء من 9.30 حتى 10.30 ..< على ذا الطاري أقول لسموتا عجل يا أخوي لو إنك تطبخ غوزي قضيت

كان اللقاء صوتي في غرفة المعالي شمل أشياء كثيرة جدا وأعلم أني تورطت جدا < بس تكفى

اللي وده يسمع اللقاء يسير في ذا ويحمله من ذا الرابط :  هووونا ! < إلا الرابط وراه براع عاد ؟ يعني مسكت على رقم 3 بالأخير ؟ براع براع

15 ميقا مدري ميجا مدري ميغا  هو حجم الملف ان طلع أصغر الله يخلف عليك ..

والله يا اللياقة دمااااار وش ذا أحس جاني شد عضلي بالشسمه

كم لي ما كتبت ؟ اصبروا أشيك .. يؤ فوق 4 شهور أشوف المدونة مكرشة < ذبة بااااخية باخية أقصد بااااااايخة برا برا

معليش سامحونن < لا ما نبي وش ذا سامحونن بعد

ايه وعلومكم بعد ؟ < نسى وين وصل

اللقاء دار حول أشياء كثيرة بداياتي في الانترنت أنا والقاء الشعر والتدريس والماجستير والكتب اللي أقراها وختمناها بقصيدة عن فلسطين ..

يعني بتاع كولو اللقاء باقي بس أبلط فيه وإلا أكنس

نشوفكم قريب ! < قريب أجل هاه ؟ والله ما الظاهر والله يا أنا راعي سحبات .. إلا على كم المكيفات ؟ < شبك خط مرة ثانية

^

أحس اللي بيقرأ ذي التدوينة بيقول الله يخلف وش ذا الدمار باللياقة والأسلوب هذا اللي يأجل عمل اليوم إلى الغد مدري يحفر حفره ويطيح فيها

إلا على طاري الحكم تذكرت اذاعة الصباح أذكر ايام المتوسط الإذاعة كل يوم نفس الشيء خصوصا الحديث خيركم من تعلم القرآن وعلمه .. بس كل يوم يختلف الراوي على مسكة اللي بيلقيه ههههههههه عادي تجي يوم تلقاه خالد بن الوليد بكرة ابو بكر الصديق أنت وحظك

^

ما شطح أبد من يقول ؟

يله يله لا يجي طاري ثاني ثم ما أخلص

ليست من عادتي كتابة تدوينتين في وقت قصير ..

لكن بعض الأخبار تستحق ..

اليوم وبحمد الله تعالى أصبحت طالباً رسمياً في ماجستير الأدب العربي في كلية اللغة العربية في جامعة الإمام محمد بن سعود الاسلامية < أرجو عدم الاطلاع على هذه التدوينة ..

كيف بدأت قصة تقديمي ؟

كونوا معي ..

بعد إعلان الجامعة في شهر ذي القعدة الماضي عن فتح باب التقديم في الماجستير .. قدمت كحال جميع الحالمين أملا في القبول ..

بعد مرور قرابة الشهرين وبعض الشهر < لاحظوا بعض الشهر بس ..

أتتني رسالة من الجامعة بموعد اختبار تحديد المستوى .. ذهب البراء الملقوف إلى موقع الجامعة بعدما تحرك عرق اللقافة لديه إثر تأثره بمن يدرسهم من الطلاب [ القصمنجية ] الذين عرفوا بلقافتهم البسيطة جدا جدا جدا

فتحت موقع الجامعة .. ودلفت إلى خبر أسماء المتقدمين إلى كلية اللغة العربية .. فوجتدهم يربون على السبعمئة طالب !

وبدأت بوادر التحطيم وتكسر الأمل أمامي ورفضت الذهاب إلى اختبار التقديم بحجة أن لا أمل فيها ! < يا حياتي تحطم !

أصر والداي على الذهاب للاختبار وذهبت من باب طاعة الوالدين وأداء الواجب وكان لدافع الفضاوة أيضا نصيب .. بحكم وقت الاختبار الذي كان مساء يوم الأحد ..

أنهيت اختباري وكان اجاباتي جيدة جدا .. ولو راجعت بعض معلوماتي قبل دخولي للاختبار لأجبت عن ما شككت فيه لكن كل هذا بسبب تصوري المسبق باستحالة القبول ..

مرت الأيام والشهور لكن السنوات لم تمر < الرجاء القيام والتصفيق لهذه الجملة [ المتعوب عليها ] !

ذات يوم وأنا في مدرستي الحبيبة التي من بيتنا ليست قريبة .. جلست أتجاذب أطراف الحديث مع صاحبي المدرس العزيز : خالد العمار .. في غرفة المعلمين ليخبرني عن ترشيحه للمقابلة ووصول رسالة له على هاتفه النقال تخبره بذلك يوم الجمعة وأن موعد مقابلته هو يوم الاثنين ..

فرحت لصاحبي وحزنت لحالي بالرغم من توقعي لذلك الخبر أصلا ! .. كان هذا الحديث يوم السبت ..

أتى يوم الأثنين وتمنيت التوفيق لصاحبي خالد ، وخرجت من مدرستي لأقابل مخدتي الرائعة في فراشي الدافئ ..

في العصر احتسيت فنجالاً من القهوة العربية الرائعة من يد أمي الحبيبة .. ثم أتاني اتصال من صاحبي عبد الله الفليج .. يخبرني عن مأساته في الجامعة .. وبحكم خبرتي السابقة بالجامعة أخذ في مواساته ورفع معنوياته ولله دري من صاحب ممتاز ..

في أثناء حديثي مع الأخ عبد الله .. دخلت لموقع الجامعة انطلاقا أيضا من غريزة اللقافة المكتسبة أيضا من معاشرتي لأقوام القصيم المتكاثرون في مدرستي كما ذكرت سابقا < تراي أحبكم والله لحد يجي يسوي زحمة

قمت بمشاهدة أسماء المرشحين للمقابلة .. لأجد اسمي يحتل المرتبة الخامسة لوحده فاهيا كصاحبه الفاهي الذي علم أنه مرشح للمقابلة في يوم الاثنين الساعة السادسة والنصف مساء .. وموعد المقابلة يوم الاثنين أيضا في الساعةالثالثة والنصف عصرا .. وياللفهاوة المطبقة على صاحبكم !

أردت البكاء .. أردت الضحك .. اضطربت المشاعر .. وهاجت الشسمه < ما جاء معي شيء .. اصبروا .. وهاجت العاطفة

اتصلت على الأخ خالد .. أخبرني أنه ما زال ينتظر دوره في المقابلة .. لينطلق البراء بسرعة السهم للبس ملابسه والخروج إلى الجامعة الحبيبة التي من بيتنا قريبة على عكس مدرستي الحبيبة التي من بيتنا بعيدة !

أجريت المقابلة كآخر شخص في ذاك اليوم .. خرجت والبسمة تعلو شفاه الدكاترة .. لأحس بطعم الانتصار يفرفر في فمي ! < وش تبي يفرفر الحين

في يوم السبت الموافق 29/2/1431 هـ أعلنت أسماء المقبولين في ماجستير قسم الأدب في جامعة الإمام محمد بن سعود الإسلامية ..

وليخرج اسمي بين طيات الخبر لتهلهل أمي وليفرح أبي وليسعد قلبي ..

واليوم الثلاثاء 2/3/1431هـ أصبحت رسميا طالبا في ماجستير الأدب في كلية اللغة العربية في جامعة الإمام محمد بن سعود الإسلامية ..

فالحمد لله والشكر له أولا وأخيرا ..

ثم الشكر لوالدي ووالدتي الذان دفعاني وأوصلاني بعد الله لهذه المنزلة ..

والشكر لمن أتمنى أن تقرأ هذه التدوينة .. فبقدومها فتح لي كثير من أبواب الخير .. أسأل الله أن يتم ما تبقى على خير ..

والشكر الجزيل أيضا للدكتور : حسن النعمي و الدكتور : عبد الملك آل الشيخ والدكتور : صالح المحمود والدكتور : ناصر كريري .. على وقوفهم معي وتزكيتهم لي ..فأسأل الله أن يجزل لهم المثوبة ويجزيهم عني خير جزاء ..

وأسأله أيضا أن يوفقني في خطوتي هذه ويكتب لي التوفيق والنجاح في الدارين ولمن أمن على دعائي ..

تم تحديث صحفة من انا على هذا الرابط !

محبكم : البراء ..