.

.

نياهاهااااااااا !  < يؤ وش جاني

السلام عليكم !

بالله وش رايكم بالعنوان ؟ تحسون مؤدب ؟ هيق هيق هيييييق !

وعلومكم يا عوال عساكم طيبين ؟

كيف بالله التصميم بالرسام < جهازه خربان

قد سبق لي يا الوجيه الطيبة اني كتبت لكم تدوينتين طيبتين بالحيل .. وبنات ناس وسنع ومنع وخلع وشلع ودلع < وقفوا لا يتحمس

على طاري لا يتحمس ومن هذا المنطلق اقول لهارد جهازي الداخلي وداعا أيها الدب النكبة لماذا ؟ لماذا تفعل هذا بي في أحسن أوقات التكية على الجهاز والحربشة فيه في وقت الاختبارات بالله عليك فيه هارد يخرب وقت الاختبار ؟ شلون نشوف اللي بالهارد لأن أحسن وقت لمثل ذي الأمور هو وقت الاختبارات

تراكم لو عطيتوني وجه وخليتوني أشطح قسما ما أخلص من الشطحات ! < زين تعرف روحك

لا تعطوني وجه سمعتوا < سم طال عمرك اللي ما يسحب عليك موب شسمه

ايه وين وصلت بالسالفة ؟ وصلت لسالفة التدوينتين اللي قبل .. يؤ وش أكتب عنه أنا أصلا الحين < أيوااااه ضاع وش يرجعه

سبق لي أنا البراء الكويس أن تكلمت عن قوقل الكويس وكيف الناس الدلوخ يبحثون بذكاء ومنعة وحسن تصرف وإجادة وامتياز وفهاوة جيدة جدا تجعلهم يصلون لمدونتي الفاهية التي لم تذهب بعيدا عن صاحبها الفاهي البراء الرشود الله يعافيكم ولا يبلاكم

أجل فيه واحد يكلفه المدير بمفاتيح خزنة الأسئلة حقت اختبارات الطلاب ويطلع ذاك اليوم بكل رواقه للدوام بدري ويوصل للمدرسة ويوم وصل وجاء بيدخل فجأة !!!! < كيف فجأة مكانها صح ؟

فجأة .. يكتشف انه ناسي مفاتح الخزنتين بالبيت وباقي على بداية الاختبار 15 دقيقة ويحتاج حول نص ساعة يروح البيت ويجي !

طبعا لحد يدري ان اللي سوا الحركة اللي فوق انا

يا ليل شطحت ونسيت أحط رابط التدوينتين !

التدوينة الأولى وبعض الكلمات اللي مدري وش تبي وتوصل لمدونتي : أيوااااه يا GooGle ! و بعد هذي التدوينة تحسبون الناس عقلوا ؟ ههاااااي نو نو أبدا اطلاقا نفر ناهي كورشانااااا أيوا اوشتاااااذ < ذي ما يعرفها إلا عبد الله السحيباني !

رجعت وكتبت بصوابعي الكويسة جدا تدوينة أخرى .. حفظ الله صوابعي في حلي وترحالي  !

التدوينة الثانية كانت بعنوان : GooGle مرة ثانية برضو ! !

وبعد فجأة من المرة التي تحدث بعض المرات أحيانا غالبا .. مسكت معي ودخلت أشيك على آخر كلمات البحث اللي وصلت لمدونتي !

يااااوك والله يا فضايح فيه وكلمات مدري وش تبي كله بسبب أبو سحلب سعيد الشهري ! < واحد وده يجيب طاري واحد بأي طريقة

كلمات البحث اللي وصلت لمدونتي حتى الآن بلغ عددها : 4,533 كلمة والحمد لله ! < من كثر قرقك والله !

وش رايكم أبدأ بأول كلمة ؟

لحظة لحظة ليش أشاور .. بأبدأ كيفي مدونتي حقتي < يؤ انحاشوا قفلت !

تقويم الأسنان بدون قواعد

بدون قواعد وإلا بدون نحو ؟ < بدون ظرافة أنت وشماغك !

—-

البراء الرشود وش اسم أمك

هههههههههههههههه الحين متعب حالك ورايح تسأل بقوقل كان سألتني eko ! ههههههههههههههههههههههه !

—-

مقطع لطفل يضحك يازين الاطفال

هذا الظاهر يوم كتب طفل يضحك تذكر ان الأطفال زينين ويونسون فلعله تحمس وقال يا زين الأطفال ! < لا عمرك تشرح تكفى

—-

هل بندر الغميز

هل البراء الرشود ؟ لماذا سعيد الشهري ؟ ليش سلمان اليحيى ؟ ! هههههههههههههه والله يا سؤاله خطير !

الله يذكرك بالخير يا بندر

—-

أبي أشوف البراء الرشود ، وشلون ؟

مدري والله !

شفتوا كيف مشهور الناس يبون يعرفوني ويشوفوني يا للهول !

—-

أبي بحر يالبراء الرشود

سم أبشر .. أحد يبي بر ؟ جو ؟ شيء ثاني أجيبه على طريقي ؟

—-

ابره الاسنان اه يعور 3 مرات وراء بعض الابره

يا الله يعور ثلاث مرات ؟ .. طيب مرتين مثلا أو أربع عادي !

اللي يرتب الجملة له هدية

—-

ابغى رابط قوقل

ههههههههههههههههههههههههههههههههههههههههههههههههههههههههههههههههههههههههههههههههههههههههههه !

ههههههههههههههههههههههههههههههههههههههههههههههههههههههههههه ! ذا تحفة لحاله ههههههههههههههههههههههههههه !

انت تبحث بقوقل وتبي رابطه هههههههههههههههههه !

—-

ابو مرعي وكيل مدرسة

ما شاء الله .. معاك البراء مدرس مدرسة !

—-

ابي اتكلم مع دكتور علم نفس

ع العين والراس بس جاي مدونتي تبي علاج ؟ الظاهر بتزود حالتك

—-

ابي تعليق على كلمه يا الهي كم انا خقق

ههههههههههههههه بالله عطوه تعليق عجزت أحصل عندي بالبيت .. كان عندنا كراتين تعليق بس قضن ولا شرينا

—-

اد الضرس مكسورة قطعة من الحشوة مازا يصير

اد مكسورة مازا ؟ من يقول ؟ هاه ؟ كن واقفا !

—-

اغنية ايدي واوا وبطنى واوا كلى واوا يجى 300 400 مليون واوه

كم طلع آخر كلام كم واوا ؟

—-

هههههههههههههههههههههههههههههههههههههههههه سم طال عمرك بنرد لك خبر ههههههههههه

هههههههههههههههه وعليكم السلام يا عزيزي الكارئ ! هههههههههههههه !

حليله كوكل مدري قوقل اثره يسولف مع الناس وراه أجل ساحب علي الظاهر معطيني بلوك !

تعوذ من ابليس يا ابن الحلال خبري به 1000 متر

هههههههههههههههههههههههههههه الظاهر الدكتور شابك سلك بخشمك هههههههههههههههههههههههههه !

كيف نطبخ الدبه

هههههههههههه شيء جديد ذا أبيه وش دبته ذي فيه اكله كذا اسمها ؟ ههههههههههههه !

هههههههههههههههه مدري ليه أحس إنه مراد اللي باحث ذا البحث هههههههههههه !

مدري والله الظاهر احمد اصرف ههههههههههههههه !

نختم بذولا الفاهيين والله يا أحس انه واحد أعرفه

ههههههههههههههه !

البراء الرشود صار ماجستير قوقل بارك له نيابه عني تكفى

ههههههههههههههههههه المهبول مهبول هههههههههههههههههههههههههههه

وه يا تعبت أحس التدوينة طويييييييييييييييلة !

طيب قفشات ع الطاير قبل لا أنهي البوست : < كيف البوست بالله موب حركة ؟ تحسون اني كيوت وواحد لطيف جدا ؟

1- أول تدوينة لي بعد عقد قراني وانتقالي من سجن العزاب إلى حرية الزواج .. يا رب وفقنا واجمع بيننا بخير !

2- مدونتي كملت سنتين ! : heh فلا تنسون تشاركون بالتصويت اللي على جنب

وشكرا ..

محبكم : البراء

Share on Facebook

السلام عليكم ..

” الحب عالم من العواطف , ودنيا من الشعور ,

فيها كل عجيب وغريب .. وليس لنا إليه إلا هذه الكوة الضيقة,

الكلمة القصيرة ذات الحرفين : الحاء والباء,

الحاء التي تمثل الحنان, والباء التي تجعل الفم وهو ينطق بها , كأنه متهيئ لقبلة .. ”

الشيخ علي الطنطاوي !

وهل ألام في حبي ؟

لك يا من أحب !

للحفظ : في ليالي الحب يحلو الأرق !

كلمات الشاعر : أسامة عبد الرحمن

من ديوان : شمعة ضمأى

إلقاء : البراء الرشود

هندسة الرائع : عبد الرحمن الراشد

Share on Facebook

..

..

..

معليش داري هاجة معي بالعنوان بس تحسون اني خطير يوم يصير معي لقاء ؟

أصلا أنا عادي أسوي لقاءات وحركات بس تنسقون مع وكيل ثاني ثانوي المفوز قصدي وكيل أعمالي < شبكت مع المفوز معليش

ودي تأذنون لي عشاني منقطع من فترة < لا ما نبي أصلا ما عندي استئذان الإستئذان من الوكيل < ذا اللي شابك خط على المدرسة

إلا ليه الطلاب يحبون يستأذنون ؟ من صرت مرشد وهم بالشيني أنواع اللي يبون يستأذنون وخذ نصب < درينا انك مرشد طلابي بالله صفقوا لي بالله

اييييه والله يا شطححححت

ايوه من مدري كم اسبوع كلمني المدعو عبد الرحمن الراشد < اللي بيشوف ذا السطر يقول وش عبد الرحمن الراشد ذا اللي كل شوي طاب بكل تدويناته يا كثرك يا سموتااا

قال عندنا بغرفة المعالي الصوتية لقاء اسبوعي وودنا نستضيفك .. طبعا أنا مشغول وقلت لازم أتغلى ووافقت < يسمع بالتغلي

طبعا يوم وافقت ومن باب الإستغلالية البحتة قلت ما عندي مشكلة أجيك وتسوي لقاء بس عندي كم شغلة بأسجلها تحلييييييييييييبل

معليش عبد الرحمن والله أحبك جدا وأعلم أني تورطت جدا ولكني جدا ما صرت جدا لأني جدا أصلا خلاص جدا < اصصصص تسمع أنت بتكوين الجمل

طبعا جيت وأصقع لكم ذيك القصيدة الغزلية مع قصيدة ثانية ثم بدينا اللقاء من 9.30 حتى 10.30 ..< على ذا الطاري أقول لسموتا عجل يا أخوي لو إنك تطبخ غوزي قضيت

كان اللقاء صوتي في غرفة المعالي شمل أشياء كثيرة جدا وأعلم أني تورطت جدا < بس تكفى

اللي وده يسمع اللقاء يسير في ذا ويحمله من ذا الرابط :  هووونا ! < إلا الرابط وراه براع عاد ؟ يعني مسكت على رقم 3 بالأخير ؟ براع براع

15 ميقا مدري ميجا مدري ميغا  هو حجم الملف ان طلع أصغر الله يخلف عليك ..

والله يا اللياقة دمااااار وش ذا أحس جاني شد عضلي بالشسمه

كم لي ما كتبت ؟ اصبروا أشيك .. يؤ فوق 4 شهور أشوف المدونة مكرشة < ذبة بااااخية باخية أقصد بااااااايخة برا برا

معليش سامحونن < لا ما نبي وش ذا سامحونن بعد

ايه وعلومكم بعد ؟ < نسى وين وصل

اللقاء دار حول أشياء كثيرة بداياتي في الانترنت أنا والقاء الشعر والتدريس والماجستير والكتب اللي أقراها وختمناها بقصيدة عن فلسطين ..

يعني بتاع كولو اللقاء باقي بس أبلط فيه وإلا أكنس

نشوفكم قريب ! < قريب أجل هاه ؟ والله ما الظاهر والله يا أنا راعي سحبات .. إلا على كم المكيفات ؟ < شبك خط مرة ثانية

^

أحس اللي بيقرأ ذي التدوينة بيقول الله يخلف وش ذا الدمار باللياقة والأسلوب هذا اللي يأجل عمل اليوم إلى الغد مدري يحفر حفره ويطيح فيها

إلا على طاري الحكم تذكرت اذاعة الصباح أذكر ايام المتوسط الإذاعة كل يوم نفس الشيء خصوصا الحديث خيركم من تعلم القرآن وعلمه .. بس كل يوم يختلف الراوي على مسكة اللي بيلقيه ههههههههه عادي تجي يوم تلقاه خالد بن الوليد بكرة ابو بكر الصديق أنت وحظك

^

ما شطح أبد من يقول ؟

يله يله لا يجي طاري ثاني ثم ما أخلص

Share on Facebook

ليست من عادتي كتابة تدوينتين في وقت قصير ..

لكن بعض الأخبار تستحق ..

اليوم وبحمد الله تعالى أصبحت طالباً رسمياً في ماجستير الأدب العربي في كلية اللغة العربية في جامعة الإمام محمد بن سعود الاسلامية < أرجو عدم الاطلاع على هذه التدوينة ..

كيف بدأت قصة تقديمي ؟

كونوا معي ..

بعد إعلان الجامعة في شهر ذي القعدة الماضي عن فتح باب التقديم في الماجستير .. قدمت كحال جميع الحالمين أملا في القبول ..

بعد مرور قرابة الشهرين وبعض الشهر < لاحظوا بعض الشهر بس ..

أتتني رسالة من الجامعة بموعد اختبار تحديد المستوى .. ذهب البراء الملقوف إلى موقع الجامعة بعدما تحرك عرق اللقافة لديه إثر تأثره بمن يدرسهم من الطلاب [ القصمنجية ] الذين عرفوا بلقافتهم البسيطة جدا جدا جدا

فتحت موقع الجامعة .. ودلفت إلى خبر أسماء المتقدمين إلى كلية اللغة العربية .. فوجتدهم يربون على السبعمئة طالب !

وبدأت بوادر التحطيم وتكسر الأمل أمامي ورفضت الذهاب إلى اختبار التقديم بحجة أن لا أمل فيها ! < يا حياتي تحطم !

أصر والداي على الذهاب للاختبار وذهبت من باب طاعة الوالدين وأداء الواجب وكان لدافع الفضاوة أيضا نصيب .. بحكم وقت الاختبار الذي كان مساء يوم الأحد ..

أنهيت اختباري وكان اجاباتي جيدة جدا .. ولو راجعت بعض معلوماتي قبل دخولي للاختبار لأجبت عن ما شككت فيه لكن كل هذا بسبب تصوري المسبق باستحالة القبول ..

مرت الأيام والشهور لكن السنوات لم تمر < الرجاء القيام والتصفيق لهذه الجملة [ المتعوب عليها ] !

ذات يوم وأنا في مدرستي الحبيبة التي من بيتنا ليست قريبة .. جلست أتجاذب أطراف الحديث مع صاحبي المدرس العزيز : خالد العمار .. في غرفة المعلمين ليخبرني عن ترشيحه للمقابلة ووصول رسالة له على هاتفه النقال تخبره بذلك يوم الجمعة وأن موعد مقابلته هو يوم الاثنين ..

فرحت لصاحبي وحزنت لحالي بالرغم من توقعي لذلك الخبر أصلا ! .. كان هذا الحديث يوم السبت ..

أتى يوم الأثنين وتمنيت التوفيق لصاحبي خالد ، وخرجت من مدرستي لأقابل مخدتي الرائعة في فراشي الدافئ ..

في العصر احتسيت فنجالاً من القهوة العربية الرائعة من يد أمي الحبيبة .. ثم أتاني اتصال من صاحبي عبد الله الفليج .. يخبرني عن مأساته في الجامعة .. وبحكم خبرتي السابقة بالجامعة أخذ في مواساته ورفع معنوياته ولله دري من صاحب ممتاز ..

في أثناء حديثي مع الأخ عبد الله .. دخلت لموقع الجامعة انطلاقا أيضا من غريزة اللقافة المكتسبة أيضا من معاشرتي لأقوام القصيم المتكاثرون في مدرستي كما ذكرت سابقا < تراي أحبكم والله لحد يجي يسوي زحمة

قمت بمشاهدة أسماء المرشحين للمقابلة .. لأجد اسمي يحتل المرتبة الخامسة لوحده فاهيا كصاحبه الفاهي الذي علم أنه مرشح للمقابلة في يوم الاثنين الساعة السادسة والنصف مساء .. وموعد المقابلة يوم الاثنين أيضا في الساعةالثالثة والنصف عصرا .. وياللفهاوة المطبقة على صاحبكم !

أردت البكاء .. أردت الضحك .. اضطربت المشاعر .. وهاجت الشسمه < ما جاء معي شيء .. اصبروا .. وهاجت العاطفة

اتصلت على الأخ خالد .. أخبرني أنه ما زال ينتظر دوره في المقابلة .. لينطلق البراء بسرعة السهم للبس ملابسه والخروج إلى الجامعة الحبيبة التي من بيتنا قريبة على عكس مدرستي الحبيبة التي من بيتنا بعيدة !

أجريت المقابلة كآخر شخص في ذاك اليوم .. خرجت والبسمة تعلو شفاه الدكاترة .. لأحس بطعم الانتصار يفرفر في فمي ! < وش تبي يفرفر الحين

في يوم السبت الموافق 29/2/1431 هـ أعلنت أسماء المقبولين في ماجستير قسم الأدب في جامعة الإمام محمد بن سعود الإسلامية ..

وليخرج اسمي بين طيات الخبر لتهلهل أمي وليفرح أبي وليسعد قلبي ..

واليوم الثلاثاء 2/3/1431هـ أصبحت رسميا طالبا في ماجستير الأدب في كلية اللغة العربية في جامعة الإمام محمد بن سعود الإسلامية ..

فالحمد لله والشكر له أولا وأخيرا ..

ثم الشكر لوالدي ووالدتي الذان دفعاني وأوصلاني بعد الله لهذه المنزلة ..

والشكر لمن أتمنى أن تقرأ هذه التدوينة .. فبقدومها فتح لي كثير من أبواب الخير .. أسأل الله أن يتم ما تبقى على خير ..

والشكر الجزيل أيضا للدكتور : حسن النعمي و الدكتور : عبد الملك آل الشيخ والدكتور : صالح المحمود والدكتور : ناصر كريري .. على وقوفهم معي وتزكيتهم لي ..فأسأل الله أن يجزل لهم المثوبة ويجزيهم عني خير جزاء ..

وأسأله أيضا أن يوفقني في خطوتي هذه ويكتب لي التوفيق والنجاح في الدارين ولمن أمن على دعائي ..

تم تحديث صحفة من انا على هذا الرابط !

محبكم : البراء ..

Share on Facebook

أين من يتكلم عن الحب الفاني ؟

أو من لوث الحب ولطخه بصفات هو منها براء براء ؟!

لن أتكلم عن القصيدة ومن شاعرها .. وما قصته إلا بعد سماعكم لها .. لتعلموا حقا عظمة الحب وعاطفة الوفاء ..

Share on Facebook

وأحوالكم وأخباركم ؟

اصبروا ترى لي فترة أبي أقول ذي الجملة الجاية !

هاااااااااااااااع طلاب يختبرون مساكيييين هاااااااااااااااع هههههههههههه والله وناسة يختبرون المساكين يختبرون

يا زينها تطلع وتفرفر وأنتو قاعدين تدرسون هااااااااااع وناسة وناسة يا للهول يا للهو وناسة الحمد لله ع العقل وناسة يا الله لا تبلانا اللهم اني أعوذ بك من الخبث والخبائث < وراه ذا قام يخربط بالأدعية

اييييه يا حليلكم والله أليفين … اصبروا اصبروا بأحول ع الوضع الثقل ! < أيوه الحين كني لا دخلت المدرسة ثقل لله دري !

أذكر أيام ما كنت بزر يعني أيام الثانوي وحولها كنت أسمع بعض الطلاب يقولون انهم يستهبلون بحل الإختبارات بس ما صدقت إلين شفت ذي الأشكال بالتصحيح فيه ناس فيهم فصلة بشكل مدري هي فهاوة مثلا أو ايش !

يعني مثلا أمس كنت أصحح أوراق الوطنية النهائي !

والله الأسئلة تااااااافهة قدن قدن تخيلوا واحد جايب 24 من 30 !

طبعا أعرف الطالب بروح أشوته وواحد ثاني كاتب لي عند انتهت الأسئلة : لا يا شيخ ! < السمايل ما له دخل داري بس مسكت

أيوه وش كنا نسولف عنه ! < ضاع وبلش وش يرجعه الحين

أنا كنت مصور بعض الصور اللي تبين فهاوة بعض الطلاب بالحل وقلت أنزلها لكم من باب نفلها ونستانس وما ندم من فلها ولا خاب من فلها أيضا ! < أها بس والله السمايل يقهر الصراحة ودي امزعه

قبل لا أنزل الصور بأسولف عن شغلة ..

مر على تجربتي بالتدريس فصل دراسي كامل .. بصراحة تجربة ممتعة جداً !

ولو خيروني الآن بين التدريس ووظيفة أخرى ما أتوقع إني بأختار غير التدريس .. بتقولون ليش ؟ طيب جوابكم جاي وراكم عجلين ! < انحححش انحححش وراه قفلت فجأة ذا

الأسباب كثييييرة .. أبرزها مثلا : مكانك كمعلم تقدر تغير أجيال كاملة بكلمة ! كلمة بس ؟ إلا بتعامل معين ممكن تغير في طالب شيء كثير خصوصا في مرحلة الثانوي ..

خلوني أسولف لكم كم سالفة صارت لي بملتقى الآباء مع المعلمين !

كنت متحمس للملتقى جداً الموهيم ما لكم بالطويلة < كن الأسلوب تغير شوي

جاني واحد يناظر بلوحة اسمي اللي على الطاولة ويتمقل ويركز !

أنا أناظره استغربت من تركيزه الزايد على اللوحة قلت – وهذا دليل على فراستي القوية – : أكيد ذا يبيني ! < ياللهول يا لها من فراسة !

قمت من مكاني واستعديت اني أسلم عليه .. سوم ناظرني قمت قال : البرااااء ؟ بن سهيييييل ؟ لا والرشود ؟ .. وتعود الفراسة مرة أخرى هنا للعمل .. قلت:  بسسسسسسسس بسسسسسس أكيد يعرفني .. وصرت ذكي زي ذي التدوينة : لا تصير واثق بنفسك دايم !

ويا ليتني لم أكن .. لأنه نطق وتكلم قائلا : مااااا شااااء الله .. اسمك تقول من العصر الجاهلي < خلوا عنكم والله يا ذبته قويه

لكن .. لكن .. لكن … < اخلص تكفى !

طبعا تتوقعون سكت على ذبته ؟ لااااا على طول قلت له : ايه والله انك صادق .. ما تشوف الفرس اللي موقف برا تراي جاي فيه < هاااه وش رايكم بذبتي ذبيب صح ؟

وفيه واحد من أولياء أمور الطلاب جاء على طول وقعد على الكرسي وقال : تدري إني من دخلت أدورك ؟ قلت أهم شيء وصلت مع ابتسامة على خشتي مثل ذي > ! < طبعا على الوحه ابتسامة وبالدخال الكثير من التساؤلات .. لماذا يبحث عني ؟ ولماذا أنا ؟ ومن أنا وأين أنا ووش جابني هنا مين أنتو ؟ هاه ؟ أبي أمي أبي أبوي < لااااا يشطح لااااا يشطح

قال أنا والد الطالب : فلان الفلاني ! < والله من اللقافة مظللين ليه بالله ؟

قلت ونعم .. قال لي : والله ولدي بالبيت ما يتكلم إلا عنك وعن اللي يستفيده منك وعن طريقتك بالتدريس واحترامك للطلاب وتأثيرك عليهم !

بصراحة .. يوم بدأ يقول ذا الكلام حسيت بفرحة لدرجة إني بغيت أدمع ! .. أن تحس بأثر لك على غيرك أمر ليس بالسهل اطلاقا !

بعد كلام ولي الأمر ذا عطاني دافع قوي جدا للعمل والاجتهاد أكثر وأكثر ..

يمكن ذي أبرز مواقف اجتماع الآباء .. طبعا فيه بعض الآباء سلبيين بشكل بس قلة ويمكن يتيسر الكلام عنهم بوقت ثاني !

ورى ما نرجع للصور < بدري يا الطيب

برب أرفعهم eko !

تيت عدنا ! < ذا اللي فاهم الاختصارات غلط

حطوا في بالكم إنهم طلاب ثااااانوي !

هذا الطالب طلب منه المدرس بحث الظاهر عن اللغة العربية .. طبعا ما أدرس الطالب .. بس شفت بحثه ومت مت ضحك

ملاحظين معي أنتو لغة الدين محمد – صلى الله عليه وسلم – ؟

طبعا أتوقع الطالب مستعجل مرة بالبحث هههههههههههه ! لأن فيه سؤال يقول : هل ترى أن للغة العربية ثقلها في مجتمعك ؟ رد وقال .. لااا فهي لغة الدين فكيف تكون ثقيلة على المجتمع ؟ !

وذا الثاني حفلة البتة طلبت منهم جملة فيها إن بعد ألا يعني مثل : ألا إن السماء ممطرة ..

خاوينا قام يقلبها يمين شمال فوق تحت ماااااش ما من جملة جت معه لعله قرر وكتب :

ههههههههههههههه !

والصورة الجاية تتكلم عن نفسها :

يا شباب دام الجو زين ليه نطلع من البيت خلونا تاكين

يله يله أحس إني طولت عليكم واجد ..

وشدوا حيلكم بالأختبارات يا طلاب !

See ya ! < حركاااات

Share on Facebook

دعوني .. دعوني فأنا – حقًا – لا أستطيع إنشاء وبناء بوابة لدخول هذه التدوينة ..

كيف أبدأ وأنا أمام أجمل عصورنا التراثية ؟ ..

أجملها طبيعةً .. أجملها شعرًا .. أوفرها ثقافةً وعلمًا .. بل أجملها نساء أيضا أليس كذلك ؟

كيف لا تكون أجملها وأروعها وأعظمها وهي تحوي ابن زيدونَ وابن خفاجة وأبا البقاء الرندي وابن عبد ربه الأندلسي ؟

أبدع الشعراء وتفننوا في ذاك العصر .. رسموا لنا لوحات أدبية عظيمة بقيت شامخة طوال هذه السنوات ..

كنت قد فكرت أن أبدأ سلسلة أدبية ملقاة بصوتي .. فلم أجد بداية أفضل – في نظري – من هذه القصيدة ..

لمتنبي الأندلس وجرير بلاد الأسبان وعاشق ولادة : ابن زيدون !

لن أطيل عليكم وسأترككم مع هذه الرائعة  ..

للاستماع :

للحفظ | Mp3

ولمن أراد كلمات القصيدة :

كلمات قصيدة أضحى التنائي لابن زيدون

ختاما ..

أسأل الله سبحانه وتعالى أن يكون ما قدمته قد حاز على رضاه  ..

وأسأله أيضا أن يكتب له القبول لديكم ..

وأسأله أن يجزل الأجر للأخ الغالي على قلبي : عبد الرحمن الراشد .. على تحمله لي وسماحه لي بتسجيل القصيدة لديه .. وتفضله أيضا بإخراجها بهذه الصورة الجميلة .. شكرا عبد الرحمن !

أرجو – إن رغبتم باستمرار هذه السلسلة – أن تنشروها وتذكروا المصدر أو تكتفوا بالضغط على :  Share on Facebook في أسفل التدوينة لتنشر على صفحات كتاب وجهكم  ..

وأرجو أن تشاركوني بنقدكم أو اقتراحاتكم لقصائد أخرى لهذه السلسلة عن طريق التعليق هنا أو مراسلتي عبر هذا النموذج : راسلني !

ولا تنسوا المشاركة في التصويت على جانب المدونة الأيمن ..

شكرا لكم والسلام عليكم ورحمة الله وبركاته ..

Share on Facebook

كيف GooGle متعوب ع الـ G الكبتل وإلا ؟ < ياااه حركة حركة أنا والـ G الكبتل والسمايل الخقق < وراه ذا ؟

أعلومكم أخباركم وأخبار أعيال أويلاه مير وين أنتو بوه ؟ < طبعا بوه وأعيال كلها نتاج تدريس طلاب قصمان للاستزادة اضغط هنا : البراء في مدارس الحضارة الأهلية < أوووه أوووه دعاااية دعااااية < ايش دخلكم أنت وياه مدونتي وبكيفي

تعلمون أعزائي الطلاب أنه قد سبق لنا قبل إجازة العيد والحج شرح .. < هيييه هييه وين رحت انت يبو يبو

إلا أنا ورى ما أخش بالموضوع على طول وأفتك ؟ < أخش وإلا مدري وشو نسيت ؟

قبل فترة كتبت تدوينة عن المفهين اللي يستخدمون GooGle ومبلشينه ببحوثاتهم اللي مدري وش تبي والبلا أغلب ذي البحوث توصل لمدونتي ..طبعا هذا يدل على كون مدونتي ثرية بالمواضيع الهادفة جدا نعم نعم كيف لا كيف لا خصوصا وأن المود مرتفع نعم نعم < متعوب على المود تحس إنه ما دخلها بالغصب وإلا يا ابو رشاد القصيبم ؟ بعدين واضح مواضيع هادفة ما جاب الهبل عندك إلا انك موب بعيد عنهم

يا فيلتي فيلتاااه نسيت أحد رابط الجزء الأول من ذي التدوينة !

عزيزي القارع إذا كنتا مع المتزوج وليس لديك أفدال وتوريدو أن تقرع التدوينة أو الجزءه السابقة لهذه التدوينهه اوزغط هونا : أيوااااه يا GooGle ! < طبعا نشكرالسيد موسى من أوهايو على مشاركته معنا في الفقرة السابقة اذا تبون تعرفون مين موسى برضو اضغطوا هنا : موسى من أوهايو متزوج وعمره سعبة وعشرين بدون أفدال

في التدوينة الماضية ذكرت أن كلمات البحث اللي حولت لمدونتي كانت : 845 كلمة ! والحين الحمد لله صارت : 2,622 كلمة !

نبدأ ؟ نبدأ ! < احلى اسلوب !

طبعا للي وده يشوف نتائج البحث يضغط على الكلمة وبتحوله على صفحة  GooGle وفيها نتايج البحث !

[ تقويم الاسنان طول وجهي ]

لحظة لحظة وش دخل التقويم بتطويل الوجه ؟ هههههههههه يعني ممكن مثلا يعرض وجهك بس يطوله ذي جديدة ههههههه بس زين احمد ربك خلاه طويل وكبرت مساحة لا بغيت تبيعه أحسن لك < تعال وش تضحك عليه أنت على ذبتك البايخة مثلا ؟

[ الراء الرشود ]

ونعم والله بولد العم .. عقبال ما يجينا الخاء الرشود الضاد الرشود ونعم ونعم

[ تقويم اسنان زينه ]

زينة وإلا نحول ؟ < مسكت على الذبة البايخة

لا أشوف أحد يجي يقول نحول وإلا نامق لا أمزعه

[ مسمار الدريل عيا يطلع ]

!

بالله بالله مدونتي وش ممكن تفيد في ذا المجال

شايفها مدونة البراء الرشود للنجارة وقطع الغيار وكيف الحال عساكم بخير كيفك بعد ؟

[ موقع جامعه الامام معلق ليش ]

استوقفني هذا البحث المؤثر بالله متى صار موقع جامعة الإمام موب معلق ؟

المفروض تقول موقع جامعة الإمام سريع ليه ؟

[ أخيي نحن علا رخم هونا ]

اللي يحل لي الغز اللي فوق له ريال هههههههه عجزت أقراه وش يبي ذا الحين وش يبي يوصل له مع GooGle أصلا ؟

[ أريد حل واجب الحضارة العربية الإسلامية ]

واجب الحضارة وإلا واجب التربية النموذجية ؟ < وتضحك أنت وسنك على ذبتك بعد ؟

[ أعض البرطم التحتي ]

يااااه ليه ؟ شلون طيب وراااه ؟ مصيبة مصيبة ! <

[ أنا أدرس في جامعة الإمام ]

ع البركة إن شاء الله تحس ان  GooGle استانس يوم درى وسوا حفلة له !

وه تعبت باقي وااااجد اصبروا اصبروا جايكم جايكم

[ أي هذه الشهور أقل أيامًا؟ دسنبر فبراير أكنوبر ]< نتيجة ذا البحث كانت لتدوينة مخفية الحين انقهروا

ههههههههه هو يا اكنوبر يا ياداير أجل دسنبر وأكنوبر ؟ هههههههههههه

[ ابغى الفزعه - سحلوب]

سحلوب سعيد سعيد ..  فيه واحد يناديك بـ GooGle الحق عليه يخوك خله يطلع خمسين !

[ احرف الموتر لاجيت البقاله والتفت وانظر يسار تشوف فله ]

هههههههههههههههههههههههههههههههههههههههههههههههههه

أما احرف الموتر ههههههههههههههههه لا وبعد يأكد عليه يعني التفت وانظر ما يصير تلتفت ولا تنظر

[ ازاى انسى انسان بحبه بجنون رجاء فيدونى ]

يااااه يااااه ألم ألم !

إزاااي بس يا مصطفى ازااااي !

[ اساليب تعليم الاطفال ذوي التأخر المدرسي بطروق اكاديمية ]

أما بطروق هههههههه انت يبي لك تعليم الله يصلحك هههههههههههههه

بطروق وإلا دبدوب ؟

[ اكوس شي في الحياة الدلاخه ينبع المستقبل ]

صحيح صحيح 100% وأكبر دليل ان  GooGle دلك على مدونتي ! < وراه قام يصيح ؟

[ البنج الموضوعي للاسنان ]

هههههههههههههه بنج موضوعي وفيه بنج درس وزي كذا بس انتبه يلعب عليك الدكتور يحط لك واحد غير موضوعي ثم تبلش وأنت تناقشه

[ ثلطعش+اثنين كم تساوي يولد ]

هههههههههههههههههههههههههه هههههههههههههههههههههههه

ما اقدر أعلق على البحث ههههههههههههههههههههههههههه أما ثلطعش هههههههههههههه

[ حولت اني اسجل نفسي في لعبت بنات فقط قالو اش كنيتك اش هيا الكنية ]

بالله علموها كسرت خاطري هههههههههههه وش الكنية مسيكينة بلشت وش تسوي ما قدرت تلعب ههههههههههه

[ صور الاستاذ عمر قاسم الحربي بمدرسة الصديق الابتدائية بالخبر امزح هاهاها ]

ههههههههه تحسون GooGle قال الله يقلع ابليسك أنت وسوالفك هههههههههه كفك كفك هههههههه مسيكين GooGle مات ضحك ذاك اليوم

[ كم واحد ساق جمس موديل 99 رقم الوحه ادق 1166 ]

يمكن 10 كذا ؟ هههههههههههه ترى GooGle يمكن يتأخر عليك بالرد راح يسوي احصائية

وه وه تعبت

نصيحة نصيحة ارحموا الشيخ GooGle تعب من بحوثكم اللي مدري وش تبي

والله يا فيه كلمات بعد بس حسيت اني طولت وتعبت ووراي نوم بكرة مدارس وتربية أجيال الله يخلف

فتكم بعافية !

^

أكثر خاتمة اختصارا في تاريخ البشرية أجل ذي خاتمه لا ومعها نصيحة أنا وخشتي

يله بس مع السلامة أكلتكم الحمامة !

اذا أعجبتك التدوينة عادي تضغط على : Share on Facebook الموجودة بآخر التدوينة وتنشرها على جدارك بالفيس بوك

Share on Facebook

السلام عليكم ورحمة الله وبركاته أبنائي الطلاب  < ذا اللي عايش الجو من الحين

وأخباركم إيه وعاملين إيه ؟

يؤ قصدي ما أخباركم وكيف أنتم أأصبحتم على خير ؟  < أيوه كذا المعلم الكويس ..

بعدما تخرجت وأصبحت رجلا كويسا !

بدأت رحلة البحث عن عمل ووظيفة وواحد من هنا يسألك هاه بشر وين صرت ؟ والثاني يقول يا رجال منت بلاقي وظيفة اقعد قشر بصل وأنا وضعي زي ذا بالضبط من ذا الكلام  < يااااه أثر الولد حنين < حنين وإلا سالي ؟ < برا بالله

حتى أتاني إهداء من أرطبون ! لمشاهدة الإهداء اضغط هنا !  < منك لله يا مهند منك لله < متأثر الولد جرحت مشاعره يا مهند ما يصير < بس كيف أتاني ؟ متعوب عليها صح ؟ < الحين كم سهم حطيت للحين والله حالتي صعبة

ايييييه وعلومكم ؟ <ذا  اللي نسى وش بيقول

طبعا قدمت على الهيئة الملكية وعلى الوزارة وأيضا ع الماجستير بس كلهم يحتاجون وقت حتى يجيك السرا !

فبرز في سمائي خيار التدريس الأهلي بحكم حبي للتدريس والقرق ! < طيب آمنا بالله ان الابتسامه هنا مهمة .. طيب إيش دخل الغمزة ؟ < طبعا برز من البروز وليس من الـ## << خلاص خلاص واضحة

وعشت في عاصفة التفكير .. إلى أين أذهب .. < من يقول حط ذا الجمله عشان السمايل ؟ أبد أبد اشااااعة

بحكم كون الوالد مشرف تربوي قال لي رح لمدارس الحضارة يمدحونها .. قلت تخيييييل أروح للحضارة مشوااااار + ما أعرف فيها أحد + كلها قصمان ! < قد يختفي البراء بعد هذه الكلمة بسبب هجوم مكثف من قبل أهل القصيم معليه أبو علولا

فقدمت على مدارس الرواد الأهلية ! بحكم قربها من البيت + فيها واحد من أعز أصحابي هو أنس الزهراني !

رحت قدمت وقالوا بنكلمك أول ما نحتاج مدرسين الكلام ذا أول رمضان !

جاني الوالد قال أجل رح لمدارس الإمام الشافعي برضو يحتاجون مدرسين ..

الشافعي من قدمت عليهم عطوني ورقة قبول قالوا خلاص نبيك مدرس ابتدائي قرآن !

وفعلا داومت عندهم أول أسبوع من عودة المعلمين .. لكن !! < ياااااااه ياااااااه اسلوووووووووووب وخر بس وخخخخخر

بيوم الثلاثاء كلمني الوالد الصباح قال كلمت المدير التنفيذي لمدارس الحضارة الأستاذ / خالد القضيب وقال خل يجي البراء نبيه !

قلت بنفسي الله يجزاك خير يا يبه وشو له الكلافة وأنا ولدك ؟ < عازمك هو مثلا

ما أمدى سكرت الجوال من الوالد إلا اتصال من الرواد يقول تعال قبلناك ! طبعا برمضان قابلوني الرواد وحطوني أول واحد بسرا احتياج المعلمين !

قلت يقلع أبو الحالة يا ما فيه أحد يقبلك يا مدرستين بوقت واحد !

يوم رحت مدارس الرواد ما أعجبني رد مديرهم العام أبو باسل أجل وشو له يكلمونك ويستعجلون !

قال بنعطيك ثالث ابتدائي قلت ألا يا مدرس ناس كبر اختي أمول ! < لمزيد من المعلومات حول هجولة أختي أمل اضغط هنا !

المهم قلت عطني فرصة لبكرة الأربعاء الصباح أرد لك خبر !

وأنا أصلا ماخذ موعد من الحضارة الثلاثاء بالليل عشان المقابلة ! < نياااهااهااااا نياااهااهاااا ذا اللي ما وده يضيع عليه أي فرصة

المهم وأروح يوم الثلاثاء بالليل إلى مدارس الحضارة وأسوي مقابلة واختبار بين المغرب والعشاء الظاهر ساعة وشوي !

بس خويكم ذيب ! أخذت بالمقابلة والإختبار التحريري 92من 100 !

وما يجيك يوم الخميس إلا أنا مدرس بالحضارة رسميا ! والحمد لله أولا وآخرا ..

الآن أتميت اسبوعين معهم ومرتاح ولله الحمد ..

خلوني أوريكم صورة لفصلي سابقا ! بتقولون ليه سابقا أقول خلوا عنكم اللقافة والإستهبال والعجلة واصبروا !

وش رايكم بس بالله موب خقق ؟ !

اييييه يا فصلي الكويس اييييه !

كان نظام المدرسة بأول اسبوع نظام قاعات .. لكل مدرس فصل يقعد فيه والطلاب يجونه وكان راااائع لولا أن بعض الطلاب ما ينعطون وجه فرجعوه ع النظام القديم لثاني وثالث ثانوي أما اول ثانوي فخلوه على النظام الجديد لأن دراستهم مقررات ولازم نظام القاعات !

وسلب مني فصلي العزيز بعد علاقة حب لمدة اسبوع كنت ما اطلع منه ومعي كتاب أقراه بوقت الفراغ وهيك يعني بس الحمد لله على كل حال ..

طبعا بعضكم بدأ يتسرب إليه داء اللقافة وش أدرس ووش المرحلة فأقول مستعينا بالله :

وش دخلكم ؟ < قفلت !

ههههههههههه حالتي صعبة مثلا ؟

أدرس نحو وأدب لفصلين من ثاني ثانوي هم 2/8 و 2/9 !

وأدرس ثاني وثالث ثانوي وطنية لجميع الفصول ..

والحمد لله الأمور ماشية زي العسسسسسل !

خصوصا ان الطلاب عندهم حالة فهاوة زي اللي عند مدرسهم بالضبط !

دخلت على فصل من فصول ثاني ودروسهم بالوطنية عن الأسرة والعلاقة بينهم !

جيت قلت متعمدا : أنتو الآن تعتبرون فرد من أفراد العائلة .. بإذن الله قولوا آمين لا كبرتوا وصار منكم آباء وامهات تصيرون تمتلكون عوائلكم الخاصة .. الطلاب كلهم آمين

قلت كويس يعني فيه ناس ناوين يصيرون أمهات مثلا ؟ ههههههههههه يقلع أبو الفهاوة

والثاني أقول له المثنى يجر بإيش ؟ يقول يجر بالإضافة !

هههههههههههههه وناااااسة

يله يله بس حسيت اني طولت وكثرت سوالف وأنا ما انعطى وجه أصلا !

نراكم على خير بإذن الله في تدوينة قريبة !

———————

أمور ع الطاير :

أشكر الأخ الكويس عبد الله السعود على كتابة البراء الرشود الموجودة بالهيدر !

وأشكر ولد عمتي الحلو عمر الدوسري على تعبه معي في الأيام الماضية بين قطع الغيار والورش ما تقصر يا عموري !

ووووبعد بس خلاص

Share on Facebook

اححححم احم احم .. أدخل ؟ < تحسون مبطي عنكم ولا يدري وش يسوي بس قسما بالله عندي عذر !

بعد آخر تدوينة سويت عملية ليزك لعيوني الحلوات وراح أنزل تدوينة جديدة عن عمليات تصحيح النظر والليزك إن شاء الله

وبعدها جاء رمضان وعادتي ما أنزل شيء برمضان

سيبونا من الكلام اللي ما يودي ولا يجيب يله وخلوني أبدا تدوينتي ! ما لكم شغل دونت وإلا تأخرت < أيوه أيوه وراه قام يزاعق ذا

أبشركم كان عيدنا اول يوم بشوال يا الله لك الحمد < قل قسم ؟

وكان عيدا كويسا جدا جدا ولذلك لأسباب كثيرة جدا جدا سأذكرها لكم جدا جدا < ذا اللي يحسب جدا جدا حركة لا كررها

طبعا ليه كان عيد كويس ؟ اولا جدا : انه أول عيد بعد تخرجي وثانيا جدا انه اول عيد لي بعد عملية الليزك ! < ذا اللي فرحان انه سوا عملية

طيب ليه ما أخلي القرق وأبدأ بالصور ؟

انطلقنا للمعايد بمسجد الوالد مسجد طلحة بن عبيد الله بعد صلاة العيد الواقع في حي النهضة بشرق الرياض طبعا بعيّد شوي عن بيتنا !

وكان قائد المركبة الأستاذ الكويس الكبير البراء الرشود < امدح نفسك ببلاش

كييييف الكشحة والشغل ؟

حسيت اني مدري كيف صراحة

المهم وصلنا للمعايد وقبل لا أحط لكم صور خلوني أعطيكم بعض الحقائق عن معايد مسجد طلحة بن عبيد الله

أصل المعايد كان في حارة قريبة من المسجد .. وكان يصل عدد الصحون إلى 200 صحن تقريبا وزيادة ..

فانقسموا إلى مجموعتين مجموعة عند المسجد ومجموعة في المكان الأول .. تحسبون العدد صار أقل ؟ لا الحمد لله صار اللي عند المسجد يوصل عدد الصحون 150 واللي بالحارة السابقة 100 وزيادة

طبعا تخيلوا ان كل عايلة بتجيب صح أو صحنين بالكثير وتخيلوا العدد !

نعود لم الصور < أما لم ما لها دخل مثل سلمان لن محمد

هنا بداية التجمع ووصول الوفود ويظهر في الصورة أنا كني بدي قارد لأبوي اللي لابس البشت وصاير كشخة كني أشوفه يوم زواجه بأمي < أيوااااه بدأ النصب بديييينا

داري داري اني أطول من أبوي وكني أكبر منه لحد يقول كذا تحطمت صرت احس اني كبير كل ما سلم علي واحد قال ما شاء الله كنك أخو أبوك الكبير ! < يا حراااام رحمناك

وهذا أيضا مع بداية التجمع

الحين بأحط لكم شلقة صور لتجمع الناس وسلامهم وبأعلق على بعضها ! < أما شلقة ما تعرف تعبر أنت ؟

—-

—

في هذه الصورة أظهر أنا وخشتي احوس بالجوال جايتني رسالة مدري من مين

—

— < الحين العادة احط ثلاث شرطات او اربع ؟ نسيت ومتعيجز اصعد فوق أشيك

وفي هذه الصورة يظهر أصغر واحد من خوالي ثاني واحد ع اليمين خالي يوسف .. كانوا يسمونه قبل صقر الحسن eko ! يعيش خالوووووو

—

في هذه الصورة 3 من عايلة العنيزي وواحد من عايلة الدايل ! تتوقعون عيال العنيزي يقولون للدايل تعال معنا خلك عنيزي واسحب ع الدايل < معليش شباب امون وإلا ؟

—

—

—

في هذه الصورة أظهر وأنا أسلم على أحد المعايدين حفظني الله في حلي وترحالي < برا بالله

—-

يظهر بالصورة  أبو معاذ القشعم .. ونعم فيه والله هذا الشخص حبيب ورائع .. بالمعايد لا بدينا الأكل يفر ع الناس يقول هاااه من يبي مرطب للفم مرطب للفم .. وش تتوقعون مركب الفم ؟ فلفل حااااااااااااااااااار ونعم المرطب والله يا ابو معاذ — عشان ما يجي واحد يضيع ابو معاذ هو اللي يمشي ع الفرش

—

—

أنا أشخص

—

طبعا لا بدت السفر تكتمل والصحن تكثر والجماعة تجتمع تبدأ الصيحات بين الجماعة فجأة كذا تسمع واحد يصارخ طااااااااح ؟ هااااه طااااااااااح ؟ الثاني لا لا اصبر اصبر باقي شوي طااااااااااااااااااح طاااااااااااااااااح ؟ لا لا باقي باقي المهم لين يقررون طاااااااااااااااااااااااح ويبدأ الدبغ بالنعمة

طبعا تختلف الأكلات بين مطبق اللحم أو المحمر ( والمحمر رز حالي شوي مع زعفران وهيل ) أو مطبق دجاج .. طبعا المطبق كلمة كويتية والأشهر عندنا يا السعوديين هي كبسة !

ونظام الأكل ما فيه اقعد على صحن وتربع ! لااااااا .. كل لقمة وامش للي بعده ما يصحش تقعد أبدا البته : فعشان كذا بتشوفون بالصور ناس واقفين ذولا في مرحلة الإنتقال بين صحن لثاني 6a

صور متنوعة للدبغ

—

—

—-

—-

—

في ذي الصورة أظهر أنا ومصعب السلطان الله يحفظنا نتابع أحوال الطعام والمؤون في العيد تحسبا لأي نكبة

—-

—

—

هذي أبرز الصور الموجودة .. طبعا ما أنسى أشكر المصور الخطير الأخ حسان أخوي اللي كان أصغر اخواني الأولاد قبل لا يجي حمودي

كيف الصورة ؟

ما تحسون انه عضو بالمافيا مثلا ؟

أصلا احسن شيء لابسه نظارتي اللي مشلحها مني

يله ختاما عيدكم سعيد مبارك العباد ليل هادئ < معلش ابو عباد شبكت خط

وكل عام وأنتو بخير !

Share on Facebook