.

.

.

نياهاهااااااااا !  < يؤ وش جاني

السلام عليكم !

بالله وش رايكم بالعنوان ؟ تحسون مؤدب ؟ هيق هيق هيييييق !

وعلومكم يا عوال عساكم طيبين ؟

كيف بالله التصميم بالرسام < جهازه خربان

قد سبق لي يا الوجيه الطيبة اني كتبت لكم تدوينتين طيبتين بالحيل .. وبنات ناس وسنع ومنع وخلع وشلع ودلع < وقفوا لا يتحمس

على طاري لا يتحمس ومن هذا المنطلق اقول لهارد جهازي الداخلي وداعا أيها الدب النكبة لماذا ؟ لماذا تفعل هذا بي في أحسن أوقات التكية على الجهاز والحربشة فيه في وقت الاختبارات بالله عليك فيه هارد يخرب وقت الاختبار ؟ شلون نشوف اللي بالهارد لأن أحسن وقت لمثل ذي الأمور هو وقت الاختبارات

تراكم لو عطيتوني وجه وخليتوني أشطح قسما ما أخلص من الشطحات ! < زين تعرف روحك

لا تعطوني وجه سمعتوا < سم طال عمرك اللي ما يسحب عليك موب شسمه

ايه وين وصلت بالسالفة ؟ وصلت لسالفة التدوينتين اللي قبل .. يؤ وش أكتب عنه أنا أصلا الحين < أيوااااه ضاع وش يرجعه

سبق لي أنا البراء الكويس أن تكلمت عن قوقل الكويس وكيف الناس الدلوخ يبحثون بذكاء ومنعة وحسن تصرف وإجادة وامتياز وفهاوة جيدة جدا تجعلهم يصلون لمدونتي الفاهية التي لم تذهب بعيدا عن صاحبها الفاهي البراء الرشود الله يعافيكم ولا يبلاكم

أجل فيه واحد يكلفه المدير بمفاتيح خزنة الأسئلة حقت اختبارات الطلاب ويطلع ذاك اليوم بكل رواقه للدوام بدري ويوصل للمدرسة ويوم وصل وجاء بيدخل فجأة !!!! < كيف فجأة مكانها صح ؟

اقرأ المزيد

Share on Facebook

سوالفي ! بحث, فهاوة, قوقل

السلام عليكم ..

..

..

..

معليش داري هاجة معي بالعنوان بس تحسون اني خطير يوم يصير معي لقاء ؟

أصلا أنا عادي أسوي لقاءات وحركات بس تنسقون مع وكيل ثاني ثانوي المفوز قصدي وكيل أعمالي < شبكت مع المفوز معليش

ودي تأذنون لي عشاني منقطع من فترة < لا ما نبي أصلا ما عندي استئذان الإستئذان من الوكيل < ذا اللي شابك خط على المدرسة

إلا ليه الطلاب يحبون يستأذنون ؟ من صرت مرشد وهم بالشيني أنواع اللي يبون يستأذنون وخذ نصب < درينا انك مرشد طلابي بالله صفقوا لي بالله

اييييه والله يا شطححححت

ايوه من مدري كم اسبوع كلمني المدعو عبد الرحمن الراشد < اللي بيشوف ذا السطر يقول وش عبد الرحمن الراشد ذا اللي كل شوي طاب بكل تدويناته يا كثرك يا سموتااا

قال عندنا بغرفة المعالي الصوتية لقاء اسبوعي وودنا نستضيفك .. طبعا أنا مشغول وقلت لازم أتغلى ووافقت < يسمع بالتغلي

طبعا يوم وافقت ومن باب الإستغلالية البحتة قلت ما عندي مشكلة أجيك وتسوي لقاء بس عندي كم شغلة بأسجلها تحلييييييييييييبل

معليش عبد الرحمن والله أحبك جدا وأعلم أني تورطت جدا ولكني جدا ما صرت جدا لأني جدا أصلا خلاص جدا < اصصصص تسمع أنت بتكوين الجمل

طبعا جيت وأصقع لكم ذيك القصيدة الغزلية مع قصيدة ثانية ثم بدينا اللقاء من 9.30 حتى 10.30 ..< على ذا الطاري أقول لسموتا عجل يا أخوي لو إنك تطبخ غوزي قضيت

كان اللقاء صوتي في غرفة المعالي شمل أشياء كثيرة جدا وأعلم أني تورطت جدا < بس تكفى

اللي وده يسمع اللقاء يسير في ذا ويحمله من ذا الرابط :  هووونا ! < إلا الرابط وراه براع عاد ؟ يعني مسكت على رقم 3 بالأخير ؟ براع براع

15 ميقا مدري ميجا مدري ميغا  هو حجم الملف ان طلع أصغر الله يخلف عليك ..

والله يا اللياقة دمااااار وش ذا أحس جاني شد عضلي بالشسمه

كم لي ما كتبت ؟ اصبروا أشيك .. يؤ فوق 4 شهور أشوف المدونة مكرشة < ذبة بااااخية باخية أقصد بااااااايخة برا برا

معليش سامحونن < لا ما نبي وش ذا سامحونن بعد

ايه وعلومكم بعد ؟ < نسى وين وصل

اللقاء دار حول أشياء كثيرة بداياتي في الانترنت أنا والقاء الشعر والتدريس والماجستير والكتب اللي أقراها وختمناها بقصيدة عن فلسطين ..

يعني بتاع كولو اللقاء باقي بس أبلط فيه وإلا أكنس

نشوفكم قريب ! < قريب أجل هاه ؟ والله ما الظاهر والله يا أنا راعي سحبات .. إلا على كم المكيفات ؟ < شبك خط مرة ثانية

^

أحس اللي بيقرأ ذي التدوينة بيقول الله يخلف وش ذا الدمار باللياقة والأسلوب هذا اللي يأجل عمل اليوم إلى الغد مدري يحفر حفره ويطيح فيها

إلا على طاري الحكم تذكرت اذاعة الصباح أذكر ايام المتوسط الإذاعة كل يوم نفس الشيء خصوصا الحديث خيركم من تعلم القرآن وعلمه .. بس كل يوم يختلف الراوي على مسكة اللي بيلقيه ههههههههه عادي تجي يوم تلقاه خالد بن الوليد بكرة ابو بكر الصديق أنت وحظك

^

ما شطح أبد من يقول ؟

يله يله لا يجي طاري ثاني ثم ما أخلص

Share on Facebook

سوالفي !, مرئيات وصوتيات !

السلام عليكم ورحمة الله وبركاته ..

ليست من عادتي كتابة تدوينتين في وقت قصير ..

لكن بعض الأخبار تستحق ..

اليوم وبحمد الله تعالى أصبحت طالباً رسمياً في ماجستير الأدب العربي في كلية اللغة العربية في جامعة الإمام محمد بن سعود الاسلامية < أرجو عدم الاطلاع على هذه التدوينة ..

كيف بدأت قصة تقديمي ؟

كونوا معي ..

بعد إعلان الجامعة في شهر ذي القعدة الماضي عن فتح باب التقديم في الماجستير .. قدمت كحال جميع الحالمين أملا في القبول ..

بعد مرور قرابة الشهرين وبعض الشهر < لاحظوا بعض الشهر بس ..

أتتني رسالة من الجامعة بموعد اختبار تحديد المستوى .. ذهب البراء الملقوف إلى موقع الجامعة بعدما تحرك عرق اللقافة لديه إثر تأثره بمن يدرسهم من الطلاب [ القصمنجية ] الذين عرفوا بلقافتهم البسيطة جدا جدا جدا

فتحت موقع الجامعة .. ودلفت إلى خبر أسماء المتقدمين إلى كلية اللغة العربية .. فوجتدهم يربون على السبعمئة طالب !

وبدأت بوادر التحطيم وتكسر الأمل أمامي ورفضت الذهاب إلى اختبار التقديم بحجة أن لا أمل فيها ! < يا حياتي تحطم !

أصر والداي على الذهاب للاختبار وذهبت من باب طاعة الوالدين وأداء الواجب وكان لدافع الفضاوة أيضا نصيب .. بحكم وقت الاختبار الذي كان مساء يوم الأحد ..

أنهيت اختباري وكان اجاباتي جيدة جدا .. ولو راجعت بعض معلوماتي قبل دخولي للاختبار لأجبت عن ما شككت فيه لكن كل هذا بسبب تصوري المسبق باستحالة القبول ..

مرت الأيام والشهور لكن السنوات لم تمر < الرجاء القيام والتصفيق لهذه الجملة [ المتعوب عليها ] !

ذات يوم وأنا في مدرستي الحبيبة التي من بيتنا ليست قريبة .. جلست أتجاذب أطراف الحديث مع صاحبي المدرس العزيز : خالد العمار .. في غرفة المعلمين ليخبرني عن ترشيحه للمقابلة ووصول رسالة له على هاتفه النقال تخبره بذلك يوم الجمعة وأن موعد مقابلته هو يوم الاثنين ..

فرحت لصاحبي وحزنت لحالي بالرغم من توقعي لذلك الخبر أصلا ! .. كان هذا الحديث يوم السبت ..

أتى يوم الأثنين وتمنيت التوفيق لصاحبي خالد ، وخرجت من مدرستي لأقابل مخدتي الرائعة في فراشي الدافئ ..

في العصر احتسيت فنجالاً من القهوة العربية الرائعة من يد أمي الحبيبة .. ثم أتاني اتصال من صاحبي عبد الله الفليج .. يخبرني عن مأساته في الجامعة .. وبحكم خبرتي السابقة بالجامعة أخذ في مواساته ورفع معنوياته ولله دري من صاحب ممتاز ..

في أثناء حديثي مع الأخ عبد الله .. دخلت لموقع الجامعة انطلاقا أيضا من غريزة اللقافة المكتسبة أيضا من معاشرتي لأقوام القصيم المتكاثرون في مدرستي كما ذكرت سابقا < تراي أحبكم والله لحد يجي يسوي زحمة

قمت بمشاهدة أسماء المرشحين للمقابلة .. لأجد اسمي يحتل المرتبة الخامسة لوحده فاهيا كصاحبه الفاهي الذي علم أنه مرشح للمقابلة في يوم الاثنين الساعة السادسة والنصف مساء .. وموعد المقابلة يوم الاثنين أيضا في الساعةالثالثة والنصف عصرا .. وياللفهاوة المطبقة على صاحبكم !

أردت البكاء .. أردت الضحك .. اضطربت المشاعر .. وهاجت الشسمه < ما جاء معي شيء .. اصبروا .. وهاجت العاطفة

اتصلت على الأخ خالد .. أخبرني أنه ما زال ينتظر دوره في المقابلة .. لينطلق البراء بسرعة السهم للبس ملابسه والخروج إلى الجامعة الحبيبة التي من بيتنا قريبة على عكس مدرستي الحبيبة التي من بيتنا بعيدة !

أجريت المقابلة كآخر شخص في ذاك اليوم .. خرجت والبسمة تعلو شفاه الدكاترة .. لأحس بطعم الانتصار يفرفر في فمي ! < وش تبي يفرفر الحين

في يوم السبت الموافق 29/2/1431 هـ أعلنت أسماء المقبولين في ماجستير قسم الأدب في جامعة الإمام محمد بن سعود الإسلامية ..

وليخرج اسمي بين طيات الخبر لتهلهل أمي وليفرح أبي وليسعد قلبي ..

واليوم الثلاثاء 2/3/1431هـ أصبحت رسميا طالبا في ماجستير الأدب في كلية اللغة العربية في جامعة الإمام محمد بن سعود الإسلامية ..

فالحمد لله والشكر له أولا وأخيرا ..

ثم الشكر لوالدي ووالدتي الذان دفعاني وأوصلاني بعد الله لهذه المنزلة ..

والشكر لمن أتمنى أن تقرأ هذه التدوينة .. فبقدومها فتح لي كثير من أبواب الخير .. أسأل الله أن يتم ما تبقى على خير ..

والشكر الجزيل أيضا للدكتور : حسن النعمي و الدكتور : عبد الملك آل الشيخ والدكتور : صالح المحمود والدكتور : ناصر كريري .. على وقوفهم معي وتزكيتهم لي ..فأسأل الله أن يجزل لهم المثوبة ويجزيهم عني خير جزاء ..

وأسأله أيضا أن يوفقني في خطوتي هذه ويكتب لي التوفيق والنجاح في الدارين ولمن أمن على دعائي ..

تم تحديث صحفة من انا على هذا الرابط !

محبكم : البراء ..

Share on Facebook

سوالفي ! الأدب العربي, الدراسات العليا, الماجستير, الماجستير الموازي, جامعة الإمام, كلية اللغة العربية

السلام عليكم ..

وأحوالكم وأخباركم ؟

اصبروا ترى لي فترة أبي أقول ذي الجملة الجاية !

هاااااااااااااااع طلاب يختبرون مساكيييين هاااااااااااااااع هههههههههههه والله وناسة يختبرون المساكين يختبرون

يا زينها تطلع وتفرفر وأنتو قاعدين تدرسون هااااااااااع وناسة وناسة يا للهول يا للهو وناسة الحمد لله ع العقل وناسة يا الله لا تبلانا اللهم اني أعوذ بك من الخبث والخبائث < وراه ذا قام يخربط بالأدعية

اييييه يا حليلكم والله أليفين … اصبروا اصبروا بأحول ع الوضع الثقل ! < أيوه الحين كني لا دخلت المدرسة ثقل لله دري !

أذكر أيام ما كنت بزر يعني أيام الثانوي وحولها كنت أسمع بعض الطلاب يقولون انهم يستهبلون بحل الإختبارات بس ما صدقت إلين شفت ذي الأشكال بالتصحيح فيه ناس فيهم فصلة بشكل مدري هي فهاوة مثلا أو ايش !

يعني مثلا أمس كنت أصحح أوراق الوطنية النهائي !

والله الأسئلة تااااااافهة قدن قدن تخيلوا واحد جايب 24 من 30 !

طبعا أعرف الطالب بروح أشوته وواحد ثاني كاتب لي عند انتهت الأسئلة : لا يا شيخ ! < السمايل ما له دخل داري بس مسكت

أيوه وش كنا نسولف عنه ! < ضاع وبلش وش يرجعه الحين

أنا كنت مصور بعض الصور اللي تبين فهاوة بعض الطلاب بالحل وقلت أنزلها لكم من باب نفلها ونستانس وما ندم من فلها ولا خاب من فلها أيضا ! < أها بس والله السمايل يقهر الصراحة ودي امزعه

قبل لا أنزل الصور بأسولف عن شغلة ..

مر على تجربتي بالتدريس فصل دراسي كامل .. بصراحة تجربة ممتعة جداً !

ولو خيروني الآن بين التدريس ووظيفة أخرى ما أتوقع إني بأختار غير التدريس .. بتقولون ليش ؟ طيب جوابكم جاي وراكم عجلين ! < انحححش انحححش وراه قفلت فجأة ذا

الأسباب كثييييرة .. أبرزها مثلا : مكانك كمعلم تقدر تغير أجيال كاملة بكلمة ! كلمة بس ؟ إلا بتعامل معين ممكن تغير في طالب شيء كثير خصوصا في مرحلة الثانوي ..

خلوني أسولف لكم كم سالفة صارت لي بملتقى الآباء مع المعلمين !

كنت متحمس للملتقى جداً الموهيم ما لكم بالطويلة < كن الأسلوب تغير شوي

جاني واحد يناظر بلوحة اسمي اللي على الطاولة ويتمقل ويركز !

اقرأ المزيد

Share on Facebook

سوالفي ! اجتماع الآباء, التدريس الأهلي, الحضارة, تدريس, مدارس أهلية, مدارس الحضارة, مدرسة الحضارة

السلام عليكم !

كيف GooGle متعوب ع الـ G الكبتل وإلا ؟ < ياااه حركة حركة أنا والـ G الكبتل والسمايل الخقق < وراه ذا ؟

أعلومكم أخباركم وأخبار أعيال أويلاه مير وين أنتو بوه ؟ < طبعا بوه وأعيال كلها نتاج تدريس طلاب قصمان للاستزادة اضغط هنا : البراء في مدارس الحضارة الأهلية < أوووه أوووه دعاااية دعااااية < ايش دخلكم أنت وياه مدونتي وبكيفي

تعلمون أعزائي الطلاب أنه قد سبق لنا قبل إجازة العيد والحج شرح .. < هيييه هييه وين رحت انت يبو يبو

إلا أنا ورى ما أخش بالموضوع على طول وأفتك ؟ < أخش وإلا مدري وشو نسيت ؟

قبل فترة كتبت تدوينة عن المفهين اللي يستخدمون GooGle ومبلشينه ببحوثاتهم اللي مدري وش تبي والبلا أغلب ذي البحوث توصل لمدونتي ..طبعا هذا يدل على كون مدونتي ثرية بالمواضيع الهادفة جدا نعم نعم كيف لا كيف لا خصوصا وأن المود مرتفع نعم نعم < متعوب على المود تحس إنه ما دخلها بالغصب وإلا يا ابو رشاد القصيبم ؟ بعدين واضح مواضيع هادفة ما جاب الهبل عندك إلا انك موب بعيد عنهم

يا فيلتي فيلتاااه نسيت أحد رابط الجزء الأول من ذي التدوينة !

اقرأ المزيد

Share on Facebook

سوالفي !

السلام عليكم ورحمة الله وبركاته أبنائي الطلاب  < ذا اللي عايش الجو من الحين

وأخباركم إيه وعاملين إيه ؟

يؤ قصدي ما أخباركم وكيف أنتم أأصبحتم على خير ؟  < أيوه كذا المعلم الكويس ..

بعدما تخرجت وأصبحت رجلا كويسا !

بدأت رحلة البحث عن عمل ووظيفة وواحد من هنا يسألك هاه بشر وين صرت ؟ والثاني يقول يا رجال منت بلاقي وظيفة اقعد قشر بصل وأنا وضعي زي ذا بالضبط من ذا الكلام  < يااااه أثر الولد حنين < حنين وإلا سالي ؟ < برا بالله

حتى أتاني إهداء من أرطبون ! لمشاهدة الإهداء اضغط هنا !  < منك لله يا مهند منك لله < متأثر الولد جرحت مشاعره يا مهند ما يصير < بس كيف أتاني ؟ متعوب عليها صح ؟ < الحين كم سهم حطيت للحين والله حالتي صعبة

ايييييه وعلومكم ؟ <ذا  اللي نسى وش بيقول

اقرأ المزيد

Share on Facebook

سوالفي ! أهلية, تدريس, مدارس, مدارس الحضارة, مدارس الرواد, مدارس الشافعي, نظام المقررات

السلام عليكم !

اححححم احم احم .. أدخل ؟ < تحسون مبطي عنكم ولا يدري وش يسوي بس قسما بالله عندي عذر !

بعد آخر تدوينة سويت عملية ليزك لعيوني الحلوات وراح أنزل تدوينة جديدة عن عمليات تصحيح النظر والليزك إن شاء الله

وبعدها جاء رمضان وعادتي ما أنزل شيء برمضان

سيبونا من الكلام اللي ما يودي ولا يجيب يله وخلوني أبدا تدوينتي ! ما لكم شغل دونت وإلا تأخرت < أيوه أيوه وراه قام يزاعق ذا

أبشركم كان عيدنا اول يوم بشوال يا الله لك الحمد < قل قسم ؟

وكان عيدا كويسا جدا جدا ولذلك لأسباب كثيرة جدا جدا سأذكرها لكم جدا جدا < ذا اللي يحسب جدا جدا حركة لا كررها

طبعا ليه كان عيد كويس ؟ اولا جدا : انه أول عيد بعد تخرجي وثانيا جدا انه اول عيد لي بعد عملية الليزك ! < ذا اللي فرحان انه سوا عملية

طيب ليه ما أخلي القرق وأبدأ بالصور ؟

انطلقنا للمعايد بمسجد الوالد مسجد طلحة بن عبيد الله بعد صلاة العيد الواقع في حي النهضة بشرق الرياض طبعا بعيّد شوي عن بيتنا !

وكان قائد المركبة الأستاذ الكويس الكبير البراء الرشود < امدح نفسك ببلاش

اقرأ المزيد

Share on Facebook

سوالفي ! Eid, Eid Mubark, عيد الفطر, عيديات, فعاليات العيد, معايد

السلام عليكم ورحمة الله وبركاته ..

مرت سنة على مدونتي الدبية

مرت سنة على كمدون أيضا !

بصراحة لما بديت التدوين كنت أفكر ليه أدون ولمين أدون ومين أنا حتى أدون ..

لكن وضعت لي هدفي وقلت أبدأ وأشوف هل أقدر أحقق هدفي أو لا ؟ وهل راح أستفيد أنا كشخص من التدوين أم لا ؟

بصراحة استفدت أشياء كثيرة من التدوين وتعرفت على أناس كثر أفادوني واستفدت منهم !

ودي أذكرهم كلهم بأسمائهم لكن أخاف أنسى أحد !

لكن بأخص 3 أشخاص بالذكر لأنهم يستحقون : ( أفياء ، أبو عابد ، عبد العزيز الهميلي )

لأنهم أصحاب فضل علي في المدونة فشكرا لهم وجزاهم الله عني خيرا ..

خلوني أعرض لكم احصائيات بسيطة عن المدونة بحكم مرور سنة على مدونتي !

نأتي الآن للأهم وهو أنتم يا زوار المدونة ..

أحتاجكم آرائكم نصائحكم اقتراحاتكم أي شيء لديكم ..

ماذا تريدون مني ؟ ماذا ينقصكم في المدونة وغيرها !

هذه مساحة مفتوحة لكم وأنتظركم !

أجلت هذا الخبر للنهاية !

بمناسبة إكمالي العام في التدوين أعلن تغيير اسم مدونتي من الاسم المستعار The Top إلى :

مدونة البراء الرشود !

أسأل الله أن تكون خطوة إيجابية وتحقق هدفها المنشود !

البراء

Share on Facebook

سوالفي ! تدوين, سنة, مدونة

السلام عليكم !

ازيكوم كيف حالكوم أنا من زماااان ما شفتكووووم !

اليوم وبحمد الله قبل لا أبدأ تدوينتي الجديدة الكويسة كليا ..

أعلن تخرجي رسميا من جامعة الإمام محمد بن سعود الإسلامية من قسم اللغة العربية هييييه  هييييه هيييه  هيييه < أبو الخريج الرقلة ماش ما من ثقل

الحين وش أبي أكتب عنه التخرج الرسمي وقضينا منه

ايه ايه ..

أنا لي فترة ما صممت أبد !

يمكن آخر تصميم رسمي لي قبل سنة ونص يمكن تزيد أو تنقص أو تزيد أو تنقص أو مثلا كذا يعني تزيد أو تنقص أو تزيد أو خلااااص

المهم سويت تصميم لمركزنا الصيفي يؤ يؤ أقصد نادينا الصيفي

طبعا يمكن ربع طويطر قصدي تويتر شافوه بجيمع المراحل اللي مر فيها

أبلشتهم كل شوي وش رايك هاه زين هاه مدري ايش وقلق جعلكم ما تصيرون مكانهم والله يا أنا نشبة وقلق  < فرحان وخشته هو وابتسامته الغبية ذي

طبعا التصميم طبع على مقاس A2 ! اي ما يعادل للشيبان اللي ما يعرفون المقاسات 4 أوراق A4

أو 70×50 سم ! < سم وإلا شسمه هذاك شلونكم بس ؟ < يا ليل انا بس من اشوف ذي الإبتسامة انقهر

والتصميم الآخر كان على شكل فلاير A5 وجهين أي نص ورقة A4 برضو للشيبان !

اقرأ المزيد

Share on Facebook

سوالفي ! إجازة, النادي الصيفي, تصميم, علوم الرياض, فوتوشوب, نادي صيفي

السلام عليكم !

الحمد لله الحمد لله الحمد لله !

اليوم خلصت آخر اختبار لي في جامعة الإمام محمد بن سعود الإسلامية في كلية اللغة العربية !

احساس غريب وبس !

وباقي الدرجات الله يتممها على خير !

دعواتكم !

وإلقاكم إن شاء الله بتدوينة إعلان التخرج رسميا !

بس خلوا عنكم والله يا سيارتي صارت خفيفة عقب ما جدعت مذكرات الجامعة

حتى غرفتي صارت وسيعة عقب ما طلعت المذكرات لقيت بالغرفة مذكرات وملازم من أول سنة بالجامعة

يؤ يؤ نسيت قمت أضحك يله يله نرجع نصيح

إهداء نشيد عشان العلولا طلب نشيد 

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

Share on Facebook

سوالفي !